ഹദീസ്: ധർമ്മനിഷ്ഠയുള്ളവനും, (ജനങ്ങളോട് ചോദിക്കാതെ) ധന്യത പുലർത്തുന്നവനും, (ജനങ്ങൾക്കിടയിൽ) അറിയപ്പെടാത്തവനുമായ അടിമയെ അല്ലാഹു തീർച്ചയായും ഇഷ്ടപ്പെടുന്നു.

عن سعد بن أبي وقاص –رضي الله عنه- مرفوعاً: "إنَّ اللهَ يُحبُّ العَبدَ التقيَّ الغنيَّ الخفيَّ".
[صحيح] - [رواه مسلم]

സഅ്ദ് ബ്നു അബീ വഖാസ് -رَضِيَ اللَّهُ عَنْهُ- നിവേദനം: നബി -ﷺ- പറഞ്ഞു: "ധർമ്മനിഷ്ഠയുള്ളവനും, (ജനങ്ങളോട് ചോദിക്കാതെ) ധന്യത പുലർത്തുന്നവനും, (ജനങ്ങൾക്കിടയിൽ) അറിയപ്പെടാത്തവനുമായ അടിമയെ അല്ലാഹു തീർച്ചയായും ഇഷ്ടപ്പെടുന്നു."
സ്വഹീഹ് - മുസ്ലിം ഉദ്ധരിച്ചത്

വിശദീകരണം

അല്ലാഹു ഇഷ്ടപ്പെടുന്ന ഒരു ദാസന്റെ വിശേഷണങ്ങൾ എന്തെല്ലാമാണെന്ന് നബി -ﷺ- വിവരിക്കുന്നു. 'ധർമ്മനിഷ്ഠയുള്ളവൻ' എന്നാൽ അല്ലാഹുവിനെ സൂക്ഷിക്കുകയും, അവന്റെ കൽപ്പനകൾ പ്രാവർത്തികമാക്കുകയും, അവന്റെ വിലക്കുകൾ ഉപേക്ഷിക്കുകയും ചെയ്യുന്നവനാണ്. നിർബന്ധകാര്യങ്ങൾ അവൻ പ്രവർത്തിക്കുകയും, നിഷിദ്ധങ്ങൾ അവൻ ഉപേക്ഷിക്കുകയും ചെയ്യുന്നു. 'ധന്യത പുലർത്തുന്നവൻ' എന്നത് കൊണ്ടുള്ള ഉദ്ദേശം അവൻ അല്ലാഹുവിനെ കൊണ്ട് ജനങ്ങളിൽ നിന്ന് ധന്യത പുലർത്തിയിരിക്കുന്നു എന്നാണ്. ജനങ്ങളോട് അവൻ ആവശ്യങ്ങൾ ചോദിച്ചു വാങ്ങുകയോ, അവരുടെ മുൻപിൽ താഴ്മയോടെ തന്റെ കാര്യങ്ങൾ അവതരിപ്പിക്കുകയോ ഇല്ല. മറിച്ച്, അവൻ ജനങ്ങളിൽ നിന്ന് തന്റെ രക്ഷിതാവിന്റെ അടുക്കൽ ധന്യത തേടിയിരിക്കുന്നു. അല്ലാഹുവല്ലാത്ത ഒരാളിലേക്കും അവൻ തിരിഞ്ഞു നോക്കുന്നേയില്ല. 'അറിയപ്പെടാത്തവനായി കഴിയുക' എന്നത് കൊണ്ടുള്ള ഉദ്ദേശം അവൻ പ്രകടനപരതക്ക് ശ്രമിക്കാത്തവനാണ് എന്നാണ്. ജനങ്ങൾക്കിടയിൽ അറിയപ്പെടണം എന്നോ, തന്നിലേക്ക് ആളുകൾ വിരൽ ചൂണ്ടണമെന്നോ, തന്നെ കുറിച്ച് അവർ സംസാരിച്ചു കൊണ്ടിരിക്കണമെന്നോ ആഗ്രഹിക്കാത്തവരാണ് അത്തരക്കാർ.