Hadithi: Ai që mëson një degë të astrologjisë, ka mësuar një degë të magjisë. Sa herë që e shton (mësimin e së parës), e shton (mësimin e së dytës)

عن ابن عباس رضي الله عنهما قال: قال رسول الله صلى الله عليه وسلم:
«من اقتبَسَ علْمًا مِنَ النُّجُومِ اقْتبَسَ شُعبَة مِن السِّحرِ، زادَ ما زادَ».
[صحيح] - [رواه أبو داود وابن ماجه وأحمد] - [سنن أبي داود: 3905]

Ibën Abasi (Allahu qoftë i kënaqur me të dy!) tregon se i Dërguari i Allahut ﷺ ka thënë:
"Ai që mëson një degë të astrologjisë, ka mësuar një degë të magjisë. Sa herë që e shton (mësimin e së parës), e shton (mësimin e së dytës)."
[Ky hadith është sahih] - [رواه أبو داود وابن ماجه وأحمد] - [Suneni i Ebu Davudit - 3905]

Shpjegimi

Profeti ﷺ në këtë hadith e sqaron se kushdo që mëson dhe merr njohuri rreth astrologjisë dhe argumentohet me lëvizjet, hyrjet e daljet e yjeve për ngjarjet tokësore, siç është vdekja e filanit, jeta ose sëmundja e tij dhe gjërat e tjera që do të ndodhin në të ardhmen, veçse ka mësuar një pjesë të magjisë, ku sa më shumë që njeriu të shtojë nga kjo dituri, aq më shumë e ka mësuar magjinë.

Mësime nga hadithi

1. Ndalimi i astrologjisë, që nënkupton parashikimin e së ardhmes duke vëzhguar vendosjen e trupave qiellorë, sepse kjo është prej pretendimit të njohjes së gajbit (të së fshehtës).
2. Astrologjia e ndaluar është një nga llojet e magjisë që bie ndesh me teuhidin (monoteizmin), ndryshe nga vëzhgimi i yjeve për të përcaktuar drejtimet, kiblen (për namaz) ose ardhjen e stinëve dhe muajve, që është e lejuar.
3. Sa më shumë që ai e mëson astrologjinë, aq më shumë i mëson degët e magjisë.
4. Yjet kanë tri dobi, të cilat i ka përmendur Allahu në Librin e Tij: stoli për qiellin, shenja përmes të cilave orientohen njerëzit dhe predha për t'i larguar shejtanët.