ဟဒီးဆ်: ဂျဟန္နမ်ငရဲအား စိတ်အလိုရမ္မက်များဖြင့် ဖုံးအုပ်ထားပြီး ဂျန္နသ်သုခဘုံအား မနှစ်မြို့ဖွယ်ရာများဖြင့် ဖုံးအုပ်ထားသည်။

عن أبي هريرة رضي الله عنه أن رسول الله صلى الله عليه وسلم قال: «حُجِبت النار بالشهوات، وحُجبت الجنة بالمَكَاره»متفق عليه وهذا لفظ البخاري. وفي رواية لهما: «حُفَّت» بدل «حُجِبت».
[صحيح] - [متفق عليه]

အဗူဟုရိုင်ရဟ်(ရဿွိယလ္လာဟုအန်ဟု)က ဆင့်ပြန်ခဲ့သည်။ အလ္လာဟ်အရှင်မြတ်၏ ရစူလ်တမန်တော်(ဆွလ္လလ္လာဟုအလိုင်ဟိဝစလ္လမ်)က မိန့်တော်မူသည်။ ဂျဟန္နမ်ငရဲအား စိတ်အလိုရမ္မက်များဖြင့် ဖုံးအုပ်ထားပြီး ဂျန္နသ်သုခဘုံအား မနှစ်မြို့ဖွယ်ရာများဖြင့် ဖုံးအုပ်ထားသည်။ (ဗုခါရီကျမ်း၊မွတ်စ်လင်မ်ကျမ်း) ဤစာသားသည် ဗုခါရီကျမ်း၏ စာသားဖြစ်သည်။ ၎င်းတို့နှစ်ဦး၏ ဆင့်ပြန်ချက်တစ်ရပ်တွင် «حجبت» ဖုံးအုပ်ထားသည် ဟူသည့်စကားလုံးအစား «حفت » ဝန်းရံထားသည် ဟုလာရှိသည်။
ဤဟဒီးဆ်သည် ဆွဟီးဟ် အဆင့်ရှိသည်။ - ဗုခါရီကျမ်းနှင့် မွတ်စ်လင်မ်ကျမ်း။

ရှင်းလင်းချက်

ဟဒီးဆ်၏အဓိပ္ပါယ်မှာ၊ ဂျန္နသ်သုခဘုံသို့ ပို့ဆောင်ပေးသော လမ်းအား လူသားမနှစ်မြို့သော အရာများဖြင့် ဝန်းရံထားသည်။ အဘယ်ကြောင့်ဆိုသော် စိတ်၏ပင်ကိုမူလသည် အေးချမ်းသက်သာမှုဘက်သို့သာ ယိမ်းယိုင်တတ်သည်။ ထိုနည်းတူ လူသားသည် ၎င်းနှင့် ငရဲကြားရှိ အတားဆီးကို ဟရာမ် တားမြစ်ထားသော အရာများကို ကျူးလွန်ခြင်း၊ အမိန့်မနာခံခြင်းအားဖြင့် မချိုးဖျက်သေးသမျှ ငရဲသို့လားရမည် မဟုတ်ပေ။ မည်သူမဆို အတားဆီးအား ချိုးဖျက်ပါက ၎င်းသည် တားဆီးထားသည့်အရာသို့ ရောက်ရှိသွားမည်ပင်ဖြစ်သည်။ သို့ရှိရာ မနှစ်မြို့ဖွယ်ရာများကို တွန်းလှန်ခြင်းဖြင့် ဂျန္နသ်သုခဘုံ၏ အတားဆီးသည် ကျိုးပျက်သွားမည်ဖြစ်ပြီး၊ စိတ်ရိုင်းအလိုရမ္မက်များကို ကျုးလွန်ခြင်းဖြင့် ဂျဟန္နမ်ငရဲ၏ အတားဆီးသည် ကျိုးပျက်သွားမည်ဖြစ်သည်။ မနှစ်မြို့ဖွယ်ရာများဟုဆိုရာတွင် ခဝပ်ကိုးကွယ်မှုပြုခြင်း၌ ကြိုးပမ်းအားထုတ်ခြင်း၊ ၎င်းအပေါ်စွဲမြဲစွာရှိခြင်းနှင့် ယင်း၏ ခက်ခဲမှုများအပေါ်သည်းခံခြင်း၊ ထို့ပြင် အမျက်ဒေါသကို ထိန်းချုပ်ခြင်း၊ ခွင့်လွှတ်ခြင်း၊ သည်းခံမျိုသိပ်ခြင်း၊ အလှူဒါနပြုခြင်း၊ မကောင်းဆက်ဆံသူကို ကောင်းမွန်စွာဆက်ဆံခြင်း၊ စိတ်ရိုင်းအလိုရမ္မက်များကို သည်းခံထိန်းချုပ်ခြင်း အစရှိသည်တို့ ပါဝင်သည်။ တစ်ခါတစ်ရံ စိတ်သည် စွဲစွဲမြဲမြဲ ဆွလာသ်ဆောက်တည်ရန် မနှစ်သက်ပေ။ အဘယ်ကြောင့်ဆိုသော် ထိုသို့ဆောက်တည်ရန် ကြိုးစားအားထုတ်ရခြင်းနှင့် စိတ်အလိုရှိသော လောကီရေးရာများကို ဖြတ်တောက်ပစ်ရသည့် အတွက်ကြောင့်ဖြစ်သည်။ တစ်ခါတစ်ရံ စိတ်သည် ဂျိဟာဒ် ပြုခြင်း ကိုမနှစ်သက်သလို၊ ဥစ္စာပစ္စည်းအား နှစ်သက်သည့် သဘာဝကြောင့် အလှူဒါနပြုခြင်းကိုလည်း မနှစ်သက်ပေ။ ထို့ပြင် အခြားကောင်းမှုများကိုလည်း မနှစ်သက်ပေ။ အကယ်၍ လူတစ်ဦးသည် အမိန့်များကိုနာခံပြီး တားမြစ်ချက်များကို ရှောင်ကြဉ်ကာ မိမိ၏ တဏှာ၊ရာဂကို ထိန်းချုပ်ပြီး စိတ်အလိုဆန္ဒများကို ဆန့်ကျင်ခဲ့လျှင် ယင်းသည် ဂျန္နသ်သုခဘုံသို့ ဝင်ရောက်ရန်နှင့် ငရဲမီးမှ ကင်းဝေးရန်အတွက် အကြောင်းခံပင်ဖြစ်သည်။ ဂျဟန္နမ်ငရဲဘုံကို ဖုံးလွှမ်းထားသည့် အလိုရမ္မက်များဟုဆိုရာတွင် အရက်သောက်ခြင်း၊ တရားမဝင် ကာမကျုးလွန်ခြင်း၊ သူစိမ်းအမျိုးသမီးအားကြည့်ရှုခြင်း၊ အတင်းပြောခြင်း၊ တူရိယာပစ္စည်းများကို အသုံးပြုခြင်း ကဲ့သို့သော တားမြစ်ထားသည့် စိတ်အလိုရမ္မက်များကို ဆိုလိုကြောင်းထင်ရှားပေသည်။ သို့ဖြစ်၍ ခွင့်ပြုထားသော အလိုရမ္မက်များမှာမူ ၎င်းတို့ထဲတွင် ပါဝင်ခြင်းမရှိပေ။ သို့သော် ယင်းတို့အား များမြောင်စွာ ပြုလုပ်ခြင်းသည် မနှစ်သက်စရာဖြစ်သည်။ ထိုသို့ပြုလုပ်ခြင်းဖြင့် ဟရာမ် တားမြစ်ထားသော အရာဘက်သို့ စိတ်ပါလာအောင်ဆွဲဆောင်ခြင်း သို့မဟုတ် နှလုံးသားကို မာကြောစေခြင်း သို့မဟုတ် အမိန့်နာခံမှု မရှိစေခြင်း သို့မဟုတ် လောကီကိုရရှိရန်သာ အလေးအနက်ထားလိုခြင်းတို့ ဖြစ်ပေါ်လာမည်ကို စိုးရိမ်ရသည်။