Ҳадис: Айтинг-чи, агар фарз намозларни ўқисам, Рамазон ойи рўзасини тутсам, ҳалолни ҳалол, ҳаромни ҳаром десам

عن جابر رضي الله عنه:
أَنَّ رَجُلًا سَأَلَ رَسُولَ اللهِ صَلَّى اللهُ عَلَيْهِ وَسَلَّمَ، فَقَالَ: أَرَأَيْتَ إِذَا صَلَّيْتُ الصَّلَوَاتِ الْمَكْتُوبَاتِ، وَصُمْتُ رَمَضَانَ، وَأَحْلَلْتُ الْحَلَالَ، وَحَرَّمْتُ الْحَرَامَ، وَلَمْ أَزِدْ عَلَى ذَلِكَ شَيْئًا، أَأَدْخُلُ الْجَنَّةَ؟ قَالَ: «نَعَمْ»، قَالَ: وَاللهِ لَا أَزِيدُ عَلَى ذَلِكَ شَيْئًا.
[صحيح] - [رواه مسلم] - [صحيح مسلم: 15]

Жобир разияллоҳу анҳудан ривоят қилинади:
Бир киши Расулуллоҳ соллаллолҳу алайҳи ва салламдан сўради: "«Айтинг-чи, агар фарз намозларни ўқисам, Рамазон ойи рўзасини тутсам, ҳалолни ҳалол, ҳаромни ҳаром десам ва бунга ҳеч нарсани қўшмасам (шу юқорида айтилганлардан бошқа амал қилмасам), жаннатга кираманми?» Расулуллоҳ соллаллоҳу алайҳи ва саллам: «Ҳа», – дедилар». Ҳалиги одам: «Аллоҳ номига онт ичиб айтаманки, бунга заррача нарсани қўшмайман!»,– деди.
[Саҳиҳ] - [Имом Муслим ривояти] - [Саҳиҳи Муслим - 15]

Изоҳ

Пайғамбаримиз соллаллоҳу алайҳи ва саллам фарз қилинган беш вақт намозни ўқиб, унга биронта нафл намозни қўшимча қилмаса ҳам, рамазон ойи рўзасини тутиб, бошқа нафл рўзаларни тутмаса ҳам, (Аллоҳ ҳалол қилган) барча нарсани ҳалол, ҳаром қилган нарсани эса, ҳаром дея эътиқод қилган кишининг жаннатга киришини баён қилмоқдалар.

Ҳадиснинг фойдалари

1. Мусулмоннинг фарз ибодатларни қилишга интилиши ва ҳаром нарсаларни тарк қилишдан бўлган мақсади жаннат бўлиши лозим.
2. Ҳалол ишларни қилишнинг аҳамияти ва уни ҳалол дея эътиқод қилиш. Ҳаром ишларни қилмаслик ва ҳаром деб эътиқод қилиш.
3. Фарз амалларни бажариш ва ҳаром нарсалардан воз кечиш, жаннатга кириш омилларидандир.