ഹദീസ്: ദിക്റുകളിൽ ഏറ്റവും ശ്രേഷ്ഠമായിട്ടുള്ളത് ലാ ഇലാഹ ഇല്ലല്ലാഹ് (അല്ലാഹുവല്ലാതെ ആരാധനക്ക് അർഹനായി മറ്റാരുമില്ല) എന്ന വാക്കാകുന്നു.

عن جابر رضي الله عنه قال: سمعت رسول الله صلى الله عليه وسلم يقول: «أفضل الذِّكر: لا إله إلا الله».
[حسن] - [رواه الترمذي والنسائي في الكبرى وابن ماجه]

ജാബിർ -رَضِيَ اللَّهُ عَنْهُ- നിവേദനം: നബി -ﷺ- പറഞ്ഞു: "ദിക്റുകളിൽ ഏറ്റവും ശ്രേഷ്ഠമായിട്ടുള്ളത് ലാ ഇലാഹ ഇല്ലല്ലാഹ് (അല്ലാഹുവല്ലാതെ ആരാധനക്ക് അർഹനായി മറ്റാരുമില്ല) എന്ന വാക്കാകുന്നു."
ഹസൻ - ഇബ്നു മാജഃ ഉദ്ധരിച്ചത്

വിശദീകരണം

ദിക്റുകളിൽ ഏറ്റവും ശ്രേഷ്ഠമായിട്ടുള്ളത് ലാ ഇലാഹ ഇല്ലല്ലാഹ് എന്ന വാക്കാകുന്നു എന്ന് നബി -ﷺ- നമ്മെ അറിയിക്കുന്നു. മറ്റൊരു ഹദീഥിലുള്ളത് ഇപ്രകാരമാണ്: "ഞാനും എനിക്ക് മുൻപുള്ള നബിമാരും പറഞ്ഞതിൽ ഏറ്റവും ശ്രേഷ്ഠമായ വാക്ക് ലാ ഇലാഹ ഇല്ലല്ലാഹ്, വഹ്ദഹു ലാ ശരീക ലഹു (അല്ലാഹുവല്ലാതെ ആരാധനക്ക് അർഹനായി മറ്റാരുമില്ല. അവൻ മാത്രമാണ് ആരാധ്യൻ. അവന് യാതൊരു പങ്കുകാരനുമില്ല) എന്ന വാക്കാകുന്നു. ഈ വാക്ക് അതിമഹത്തരമായ വാക്കാണ് എന്നതിൽ യാതൊരു സംശയവുമില്ല. ആകാശഭൂമികൾ നിലനിൽക്കുന്നത് പോലും അതിലാണ്. അത് നിറവേറ്റപ്പെടുന്നതിനാണ് സർവ്വ സൃഷ്ടികളും സൃഷ്ടിക്കപ്പെട്ടത്. അല്ലാഹുവിൻ്റെ എല്ലാ റസൂലുകളും നിയോഗിക്കപ്പെട്ടതും, അവൻ്റെ എല്ലാ ഗ്രന്ഥങ്ങളും അവതരിപ്പിക്കപ്പെട്ടതും, അവൻ്റെ മതനിയമങ്ങൾ നിശ്ചയിക്കപ്പെട്ടതും ആ സന്ദേശവുമായി തന്നെ. (പരലോകത്തിലെ) തുലാസ്സുകൾ സ്ഥാപിക്കപ്പെട്ടതും, (പ്രവർത്തനങ്ങളുടെ) ഏടുകൾ വെക്കപ്പെട്ടതും അതിന് വേണ്ടി തന്നെ. സ്വർഗത്തിൻ്റെയും നരകത്തിൻ്റെയും അടിത്തറയും അത് തന്നെ. (ലാ മഅ്മൂദ ബിഹഖ്ഖിൻ ഇല്ലല്ലാഹ്) 'അല്ലാഹുവല്ലാതെ ആരാധനക്ക് അർഹനായി യഥാർത്ഥത്തിൽ മറ്റാരുമില്ല' എന്നതാകുന്നു അതിൻ്റെ അർത്ഥം. ഏഴു നിബന്ധനകൾ ഈ വാക്കിനുണ്ട്. (ഈ സാക്ഷ്യവചനം) അറിയുക, ഉറച്ചു വിശ്വസിക്കുക, ഉൾക്കൊള്ളുക, അതിന് കീഴൊതുങ്ങുക, അത് ഉച്ചരിക്കുന്നത് സത്യസന്ധമായിട്ടായിരിക്കുക, അത് അല്ലാഹുവിന് മാത്രം നിഷ്കളങ്കമായിരിക്കുക, അല്ലാഹുവിനോട് അങ്ങേയറ്റത്തെ സ്നേഹമുണ്ടായിരിക്കുക എന്നതാണ് അവ. സർവ്വ മനുഷ്യരും ഈ വാക്കിനെ കുറിച്ച് പരലോകത്ത് ചോദ്യം ചെയ്യപ്പെടുന്നതാണ്. ഒരാളുടെയും കാൽപ്പാദം രണ്ട് കാര്യങ്ങളെ കുറിച്ച് ചോദിക്കപ്പെടാതെ അനങ്ങുകയില്ല. ഒന്ന്: നിങ്ങൾ എന്തിനെയായിരുന്നു ആരാധിച്ചിരുന്നത്?! രണ്ട്: നിങ്ങൾ അല്ലാഹുവിൻ്റെ ദൂതന്മാർക്ക് എന്ത് ഉത്തരമാണ് നൽകിയത്?! 'ലാ ഇലാഹ ഇല്ലല്ലാഹ്' അറിഞ്ഞും അംഗീകരിച്ചും പ്രാവർത്തികമാക്കിയാൽ ഒന്നാമത്തെ ചോദ്യത്തിൻ്റെ ഉത്തരമായി. 'മുഹമ്മദുൻ റസൂലുല്ലാഹ്' (മുഹമ്മദ് നബി അല്ലാഹുവിൻ്റെ റസൂലാണ്) എന്നത് അറിഞ്ഞും അംഗീകരിച്ചും കീഴൊതുങ്ങിയും അനുസരിച്ചും നിലകൊണ്ടാൽ രണ്ടാമത്തേതിനുമുള്ള ഉത്തരമായി. നബി -ﷺ- പറഞ്ഞു: ഇസ്ലാം പടുത്തുയർത്തപ്പെട്ടിരിക്കുന്നത് അഞ്ച് കാര്യങ്ങൾക്ക് മീതെയാകുന്നു. (അതിൽ ഒന്നാമത്തേത്) ലാ ഇലാഹ ഇല്ലല്ലാഹ്, മുഹമ്മദുൻ റസൂലുല്ലാഹ് എന്ന സാക്ഷ്യവചനമാകുന്നു."