Hadith: “ការបួងសួង គឺជាការគោរពសក្ការៈ(អ៊ីហ្ពាហ្ទាត់)

عن النعمان بن بَشِير رضي الله عنه قال: سمعت النبيَّ صلى الله عليه وسلم يقول:
«الدُّعَاءُ هُوَ الْعِبَادَةُ»، ثُمَّ قَرَأَ: «{وَقَالَ رَبُّكُمُ ادْعُونِي أَسْتَجِبْ لَكُمْ إِنَّ الَّذِينَ يَسْتَكْبِرُونَ عَنْ عِبَادَتِي سَيَدْخُلُونَ جَهَنَّمَ دَاخِرِينَ} [غافر: 60]».
[صحيح] - [رواه أبو داود والترمذي وابن ماجه وأحمد] - [سنن الترمذي: 3247]

អំពី អាន់នួកម៉ាន ពិន ហ្ពាស្ហៀរ رضي الله عنه បាននិយាយថា៖ ខ្ញុំបានឮណាពី ﷺ លោកបានមានប្រសាសន៍ថា៖
“ការបួងសួង គឺជាការគោរពសក្ការៈ(អ៊ីហ្ពាហ្ទាត់)”។ ក្រោយមក លោកបានសូត្រ៖ ﴿وَقَالَ رَبُّكُمُ ادْعُونِي أَسْتَجِبْ لَكُمْ إِنَّ الَّذِينَ يَسْتَكْبِرُونَ عَنْ عِبَادَتِي سَيَدْخُلُونَ جَهَنَّمَ دَاخِرِينَ﴾ [سورة غافر(60)] “ហើយម្ចាស់របស់អ្នកបានមានបន្ទូលថា៖ ចូរពួកអ្នកបួងសួងសុំមកចំពោះយើងចុះ យើងនឹងទទួលយកការបួងសួងសុំរបស់ពួកអ្នក។ ពិតប្រាកដណាស់ ពួកដែលក្រអឺតក្រទមចំពោះការគោរពសក្ការៈមកចំពោះយើង ពួកគេនឹងចូលនរកជើហាន់ណាំយ៉ាងអាម៉ាស់បំផុត”។ (ហ្គហ្វៀរ៖៦០)
[صحيح] - [رواه أبو داود والترمذي وابن ماجه وأحمد] - [سنن الترمذي - 3247]

Explanation

ណាពី ﷺ លោកបានប្រាប់ថា ជាការពិតណាស់ ការបួងសួង(ទូអា) គឺជាការគោរពសក្ការៈ(អ៊ីហ្ពាហ្ទាត់)។ ដូចនេះ ចាំបាច់ត្រូវបួងសួងដោយចិត្តជ្រះថ្លា(អៀខ្លើស)ចំពោះអល់ឡោះ ទោះជាការបួងសួងនោះ ជាការបួងសួងសុំចង់បានអ្វីមួយ ដូចជាការបួងសួងសុំពីអល់ឡោះនូវអ្វីដែលផ្តល់ផលប្រយោជន៍ និងការពារពីគ្រោះថ្នាក់ពីរូបគេទាំងក្នុងលោកិយនិងថ្ងៃបរលោក ឬមួយជាការបួងសួងជាលក្ខណៈសក្ការៈបូជា(អ៊ីហ្ពាហ្ទាត់) ពោលគឺសំដៅរាល់ប្រការទាំងឡាយដែលអល់ឡោះជាម្ចាស់ស្រឡាញ់ពេញចិត្ត មិនថាជាពាក្យសម្តី ឬកាយវិការ ទាំងខាងក្នុង និងខាងក្រៅ មិនថាជាការសក្ការៈផ្នែកផ្លូវចិត្ត ផ្លូវកាយ ឬតាមរយៈទ្រព្យសម្បត្តិនោះឡើយ។
ក្រោយមក ណាពី ﷺ បានលើកយកភស្តុតាងមកបញ្ជាក់ដោយលោកសូត្រនូវបន្ទូលរបស់អល់ឡោះជាម្ចាស់ដែលទ្រង់បានមានបន្ទូលថា៖ “ហើយម្ចាស់របស់អ្នកបានមានបន្ទូលថា៖ ចូរពួកអ្នកបួងសួងសុំមកចំពោះយើងចុះ យើងនឹងទទួលយកការបួងសួងសុំរបស់ពួកអ្នក។ ពិតប្រាកដណាស់ ពួកដែលក្រអឺតក្រទមចំពោះការគោរពសក្ការៈមកចំពោះយើង ពួកគេនឹងចូលនរកជើហាន់ណាំយ៉ាងអាម៉ាស់បំផុត”។

Benefits from the Hadith

1. ការបួងសួងសុំទូអា គឺជាមូលដ្ឋាននៃការគោរពសក្ការៈ(អ៊ីហ្ពាហ្ពាត់) ហើយគេមិនអនុញ្ញាតឲ្យបង្វែរវាទៅកាន់អ្នកផ្សេងក្រៅពីអល់ឡោះឡើយ។
2. ការបួងសួង គឺផ្ទុកនូវធាតុពិតនៃភាពជាខ្ញុំបម្រើ(ទៅចំពោះអល់ឡោះជាម្ចាស់) ហើយទទួលស្គាល់នូវភាពមានបានមិនត្រូវអ្នកដទៃរបស់ព្រះជាម្ចាស់ និងសមត្ថភាពរបស់ទ្រង់ ព្រមទាំងទទួលស្គាល់នូវភាពខ្សត់ខ្សោយ ខ្វះខាតរបស់ខ្ញុំបម្រើអល់ឡោះដែលត្រូវការទ្រង់។
3. ការព្រមានយ៉ាងធ្ងន់ធ្ងរនេះ គឺជាការតបស្នងចំពោះភាពក្រអឺតក្រទមមិនព្រមគោរពសក្ការៈចំពោះអល់ឡោះជាម្ចាស់ និងបោះបង់ការបួងសួងទៅកាន់ទ្រង់។ ជាការពិតណាស់ ពួកដែលក្រអឺតក្រទមមិនបួងសួងទៅកាន់អល់ឡោះនោះ ពួកគេនឹងចូលទៅក្នុងឋាននរកជើហាន់ណាំក្នុងនាមជាពួកដែលទាបថោក និងអាម៉ាស់ជាទីបំផុត។