ဟဒီးဆ်: မည်သူမဆို အဆ်ွရ်ဆွလာသ်ကို စွန့်လွှတ်ပါက ၎င်း၏ကောင်းမှုများသည် အမှန်တကယ်ပင် အချည်းနှီးဖြစ်သွားပေမည်။

عن بريدة بن الحصيب رضي الله عنه قال: قال رسول الله صلى الله عليه وسلم : «من تَرَكَ صلاةَ العصرِ فقد حَبِطَ عَمَلُهُ».
[صحيح] - [رواه البخاري]

ဗုရိုင်ဒဟ်ဗင်န်ဟုဆွိုဗ်(ရဿွိယလ္လာဟုအန်ဟု)က ဆင့်ပြန်ခဲ့သည်။ အလ္လာဟ်အရှင်မြတ်၏ ရစူလ်တမန်တော်(ဆွလ္လလ္လာဟုအလိုင်ဟိဝစလ္လမ်) မိန့်ကြားတော်မူသည်။ မည်သူမဆို အဆ်ွရ်ဆွလာသ်ကို စွန့်လွှတ်ပါက ၎င်း၏ကောင်းမှုများသည် အမှန်တကယ်ပင် အချည်းနှီးဖြစ်သွားပေမည်။
[ဤဟဒီးဆ်သည် ဆွဟီးဟ် အဆင့်ရှိသည်။] - [ဗုခါရီကျမ်း။]

ရှင်းလင်းချက်

အဆ်ွရ်ဆွလာသ်ကို တမင်စွန့်လွှတ်သူအတွက် ပြစ်ဒဏ်ရှိကြောင်းကို ဤဟဒီးဆ်တော်မှ သိရှိရသည်။ အဆ်ွရ်ဆွလာသ်ကို သီးသန့်တင်ပြရခြင်းမှာ နေ့တွင် အလုပ်၏ ပင်ပန်းနွမ်းနယ်မှုကြောင့် နောက်ကျနိုင်ချေရှိသည့်အတွက် ဖြစ်သည်။ ထိုဆွလာသ်ကို လွှတ်ခြင်းသည် အခြားဆွလာသ်ကိုလွှတ်ခြင်းထက် ပိုဆိုးပြီး ၎င်းသည် အထူးထိန်းသိမ်းရန် အမိန့်ပေးထားသော အလယ်ဆွလာသ်လည်းဖြစ်သည်။ အလ္လာဟ်အရှင်မြတ်မိန့်တော်မူသည်မှာ “အသင်တို့သည် (ယေဘုယျအားဖြင့်) အားလုံးသော ဆွလာသ်ဝတ်ပြုခြင်းတို့ကို လည်းကောင်း၊ (အထူးသဖြင့်) အလယ်ဖြစ်သော “ဆွလာသ်” ဝတ်ပြုမှုကိုလည်းကောင်း၊ စောင့်ရှောက်ထိန်းသိမ်းကြလေကုန်။”(စူရဟ် ဘကရဟ် - ၂၃၈) ထိုဆွလာသ်ကို စွန့်လွှတ်ခြင်း၏ ပြစ်ဒဏ်မှာ စွန့်လွှတ်သူ၏ ကောင်းမှုများပျက်စီးသွားပြီး ၎င်း၏အကျိုးကုသိုလ်များ အချည်းနှီးဖြစ်သွားမည်ဖြစ်သည်။ အချို့သာသနာ့ပညာရှင်များက ထိုသို့အချည်းအနှီးဖြစ်သွားခြင်း၏ အလိုသဘောမှာ ၎င်းဆွလာသ်အား စွန့်လွှတ်ခြင်းကိုပိုင်သည်ဟု မှတ်ယူသူ သို့မဟုတ် ၎င်းဆွလာသ်၏ ဖရ်ဿွ် တာဝန်ကို ငြင်းပယ်သူအတွက်သာ ဖြစ်သည်ဟုဆိုကြသည်။ ဤသို့ဆိုလျှင် ကောင်းမှုများ ပျက်စီးသွားခြင်းဟူသည် ကုဖ်ရ် ထိုက်ခြင်းကိုဆိုလိုခြင်းပင်ဖြစ်သည်။ အချို့ပညာရှင်များက အဆ်ွရ်ဆွလာသ်ကို စွန့်လွှတ်သူသည် ကုဖ်ရ်ထိုက်ကြောင်းကို ဤအချက်ဖြင့် အထောက်ထားပေးကြသည်။ အဘယ်ကြောင့်ဆိုသော် အစ္စလာမ်ကိုလက်ခံပြီးနောက် ပြန်လည်စွန့်လွှတ်ခြင်းကသာ ကောင်းမှုများအား အချည်းနှီးဖြစ်စေမည်ဖြစ်သည်။ အချို့သာသနာ့ပညာရှင်များက ဤသည်သတိပေး ခြိမ်းခြောက်သောအားဖြင့် လာရှိခြင်းဖြစ်ပြီး ၎င်း၏အလိုသဘောမှာ ထိုဆွလာသ်အားစွန့်လွှတ်သူသည် ၎င်း၏ ကောင်းမှုများ အချည်းနှီးဖြစ်သွား သကဲ့သို့ပင်ဖြစ်သည်ဟု ဆိုကြသည်။ ဤသည် အဆွ်ရ်ဆွလာသ်၏ သီးသန့်ထူးကဲမွန်မြတ်မှုများဖြစ်ပြီး ယင်းဆွလာသ်သည် အမှန်ပင်ကြီးကျယ်လှသည့်အတွက် ၎င်းကိုစွန့်လွှတ်သူ၏ ကောင်းမှုများသည် အချည်းနှီး ဖြစ်သွားမည်ဖြစ်သည်။