Hadithi: Pastërtia është gjysma e besimit

عن أبي مالك الحارث بن الأشعري رضي الله عنه قال: قال رسول الله صلى الله عليه وسلم: «الطهور شطر الإيمان، والحمد لله تملأ الميزان، وسبحان الله والحمد لله تملآن -أو تملأ- ما بين السماء والأرض، والصلاة نور، والصدقة برهان، والصبر ضياء، والقرآن حجة لك أو عليك، كل الناس يغدو: فبائعٌ نفسَه فمُعتِقُها أو مُوبِقها».
[صحيح] - [رواه مسلم]

Ebu Malik el Harith ibn Asim el Eshariu (Allahu qoftë i kënaqur me të!) përcjell se i Dërguari i Allahut ﷺ ka thënë: "Pastërtia është gjysma e imanit, (thënia) "elhamdulilah" e rëndon peshoren, (thëniet) "subhanallah" (i patëmeta është Allahu) dhe "elhamdulilah" (lavdërimi i takon Allahut) mbushin hapësirën ndërmjet Qiellit dhe Tokës. Namazi është nur, lëmosha është argument, durimi është ndriçim dhe Kurani është argument, për ose kundër teje. Andaj, çdo njeri, kur zgjohet në mëngjes, ose do ta shesë veten duke e liruar atë, ose do të vetëshkatërrohet.
Ky hadith është sahih. - E shënon Muslimi.

Shpjegimi

I Dërguari i Allahut ﷺ ka përmendur se pastrimi është gjysma e besimit. Pastrimi nënkupton ujin me të cilin pastrohet (njeriu), por ajo që nënkuptohet me të është akti i pastrimit, pra, nënkuptohet pastrimi i së jashtmes (gjymtyrëve) dhe pastrimi i së brendshmes (zemrës), kurse gjysma e besimit nënkupton gjysmën e namazit, sepse namazi refuzohet pa pastrim. Ai e përmendi se fjala "elhamdulilah" e mbush (e rëndon) peshoren. Elhamdulilahu është përshkrim i Zotit të Lartmadhëruar me cilësi të përosura e veçori madhështore, duke i shprehur dashuri e madhërim. Kjo e rëndon peshoren me të cilën maten veprat. Fjala "subhanallah" është pohim se Allahu është i dëlirë nga çdo e metë dhe nga përngjasimi i krijesave. Thëniet "subhanallah" (i patëmeta është Allahu) dhe "elhamdulilah" (lavdërimi i takon Allahut) mbushin hapësirën ndërmjet Qiellit dhe Tokës në gjatësi udhëtimi sa pesëqind vjet. Një ose dy fjalë e mbushin peshoren, sepse mirësia e Allahut nuk kufizohet. "Namazi është nur (dritë)", dritë në këtë botë dhe dritë për robin në Ditën e Kiametit. "Lëmosha është argument", pra dëshmi e pakontestueshme që tregon besimin e sinqertë të lëmoshëdhënësit, për shkak se shpirtrat janë të prirë ta duan pasurinë, kështu që fakti se një person i nxjerr këto para natyrshëm nga vetja e tij, nuk ka dyshim se kjo është dëshmi e pakontestueshme dhe argument i qartë për besimin e tij të sinqertë. "Durimi është ndriçim" me të tri llojet e tij: durim në kryerjen e adhurimit, durim në largimin prej mëkatit dhe durim ndaj caktimeve të dhimbshme. Durimi është ndriçim që i ndriçon rrugën durimtarit. "Kurani është argument për ose kundër teje." Kurani është fjala e Allahut që i zbriti Profetit të Tij ﷺ, - përmes Xhibrilit, - i ruajtur në mes dy kapakëve, të cilin kushdo që e lexon është sikurse t'i drejtohet të Gjithëmëshirshmit. Ai ose është argument për ty, nëse je besimtar dhe i beson gjithçkaje që është në të, duke vepruar sipas urdhrave të tij dhe duke iu shmangur ndalesave të tij. Kështu, Kurani do të jetë argument për ty në Ditën e Kiametit; ose është argument kundër teje, nëse e mëson përmendsh dhe e shpërfill, e neglizhon namazin ose bën diçka që bie ndesh me urdhrat dhe ndalesat e tij, atëherë ai do të jetë argument kundër teje. "Çdo njeri, kur zgjohet në mëngjes" del në Tokë, shpërndahet dhe e kërkon furnizimin. Por, për disa dalja në mëngjes është në dobi të tyre, e për disa të tjerë kjo dalje në mëngjes është fatkeqësi. Kështu, të gjithë e shesin veten, pra, angazhohen me punë, kështu që ose ia shesin Allahut të Lartmadhëruar dhe e shpëtojnë veten nga Zjarri, ose ia shesin shejtanit duke bërë mëkate, krime dhe vepra të këqija, e kështu t'i shkatërrohen në Zjarr.