Hadithi: Ebu Rukaje Temim ibën Eus Dariu (Allahu qoftë i kënaqur me të!) transmeton se Profeti ﷺ ka thënë:||"Feja është sinqeriteti." E pyetëm: "Ndaj kujt?" Ai tha: "Ndaj Allahut, ndaj Librit dhe të Dërguarit të Tij, ndaj prijësve të muslimanëve, si dhe ndaj shtresës së përgjithshme të muslimanëve

عَنْ أَبِي رُقَيَّةَ تَمِيمِ بْنِ أَوْسٍ الدَّارِيِّ رَضِيَ اللَّهُ عَنْهُ أَنَّ النَّبِيَّ صَلَّى اللَّهُ عَلَيْهِ وَسَلَّمَ قَالَ:
«الدِّينُ النَّصِيحَةُ» قُلْنَا: لِمَنْ؟ قَالَ: «لِلهِ وَلِكِتَابِهِ وَلِرَسُولِهِ وَلِأَئِمَّةِ الْمُسْلِمِينَ وَعَامَّتِهِمْ».
[صحيح] - [رواه مسلم] - [الأربعون النووية: 7]

Ebu Rukaje Temim ibën Eus Dariu (Allahu qoftë i kënaqur me të!) transmeton se Profeti ﷺ ka thënë:
"Feja është sinqeriteti." E pyetëm: "Ndaj kujt?" Ai tha: "Ndaj Allahut, ndaj Librit dhe të Dërguarit të Tij, ndaj prijësve të muslimanëve, si dhe ndaj shtresës së përgjithshme të muslimanëve."
[Ky hadith është sahih] - [E shënon Muslimi] - [الأربعون النووية - 7]

Shpjegimi

Profeti ﷺ na tregon në këtë hadith se feja bazohet në sinqeritet dhe çiltërsi, në mënyrë që ajo të përmbushet ashtu siç ka urdhëruar Allahu, plotësisht, pa cungim e pa mashtrim. Profetin ﷺ e pyetën: "Ndaj kujt është sinqeriteti?" Ai tha: Së pari: sinqeriteti ndaj Allahut të Lartmadhëruar, duke punuar sinqerisht për Të, duke mos i bërë ortak (shirk), duke besuar në zotërimin, hyjnitetin dhe në emrat e cilësitë e Tij, dhe duke e respektuar urdhrin e Tij e duke thirrur për të besuar në Të. Së dyti: sinqeriteti ndaj Librit të Tij, që është Kurani i madhërishëm. Pra, të besojmë se ai është Fjala e Tij e libri i Tij i fundit, dhe se ai i shfuqizoi të gjitha ligjet (sheriatet) para tij. Ne e madhërojmë atë dhe e lexojmë ashtu siç duhet. Punojmë sipas ajeteve të tij që janë krejtësisht të qarta (muhkemat) dhe i pranojmë ato që janë jo krejtësisht të qarta (muteshabihat). E mbrojmë atë nga interpretimi i shtrembëruesve, marrim mësim nga këshillat e tij, i përhapim dituritë e tij dhe ftojmë tek ai. E treta: sinqeriteti ndaj të Dërguarit të Tij, Muhamedit ﷺ. Pra, të besojmë se ai është profeti i fundit, t'i besojmë asaj që solli, t'u bindemi urdhrave të tij dhe t'u shmangemi ndalesave të tij. Ta adhurojmë Allahun vetëm me atë që ai solli, ta respektojmë, ta nderojmë, ta përhapim thirrjen e tij, t'i përhapim ligjet (sheriatin) e tij dhe t'i mohojmë akuzat që hidhen kundër tij. E katërta: sinqeriteti ndaj prijësve të muslimanëve, duke i ndihmuar ata në të vërtetën, duke mos i kundërshtuar në çështjet e tyre, t'i dëgjojmë dhe t'u bindemi për sa kohë që i binden Allahut. Së pesti: sinqeriteti ndaj muslimanëve, duke u bërë mirë dhe duke i ftuar tek e mira, duke i ruajtur nga dëmet, duke u dëshiruar të mirat dhe duke bashkëpunuar me ta në mirësi e devotshmëri.

Mësime nga hadithi

1. Urdhri për të qenë të sinqertë (e për të këshilluar) me të gjithë.
2. Pozita madhështore që gëzon sinqeriteti (këshilla) në fe.
3. Feja ngërthen në vete besime, fjalë dhe vepra.
4. Nga sinqeriteti është që të jesh i dëlirë nga mashtrimi ndaj atij që e këshillon dhe ta dëshirosh të mirën për të.
5. Metoda e shkëlqyer e mësimdhënies nga ana e Profetit ﷺ, meqë e përmendi sinqeritetin fillimisht në mënyrë të përgjithshme, e më pas e sqaroi hollësisht.
6. Fillimi me gjërat që janë më të rëndësishme e kështu me radhë, sepse Profeti ﷺ filloi me sinqeritetin ndaj Allahut, Librit (Kuranit), Profetit ﷺ, prijësve të muslimanëve e më pas sinqeritetin ndaj shtresës së përgjithshme të muslimanëve.