ഹദീസ്: നിങ്ങൾ ഈ ചന്ദ്രനെ കാണുന്നത് പോലെ നിങ്ങളുടെ രക്ഷിതാവിനെ കാണുന്നതാണ്. അവനെ കാണുന്നതിൽ നിങ്ങൾക്ക് യാതൊരു പ്രയാസവുമുണ്ടായിരിക്കുന്നതല്ല.

عن جرير بن عبد الله البجلي رضي الله عنه قال: كنا عندَ النبيِّ صلى الله عليه وسلم فنظرَ إلى القمرِ ليلةَ البدرِ، فقالَ: «إنَّكم سترون ربَّكُمْ كما تروْن هذا القمر، لاَ تُضَامُونَ في رُؤْيَته، فَإن استطعتم أنْ لاَ تُغْلَبُوا على صلاة قبل طُلُوعِ الشَّمْسِ وَقَبْلَ غُرُوبِهَا، فَافْعَلُوا». وفي رواية: «فنظر إلى القمر ليلة أربع عشرة».
[صحيح] - [متفق عليه]

ജരീർ ബ്നു അബ്ദില്ല അൽ ബജലി -رَضِيَ اللَّهُ عَنْهُ- നിവേദനം: ഞങ്ങൾ നബി -ﷺ- യോടൊപ്പമായിരുന്നു. പൂർണ്ണചന്ദ്രനുള്ള ആ രാത്രിയിൽ ചന്ദ്രനിലേക്ക് നോക്കിക്കൊണ്ട് അവിടുന്ന് പറഞ്ഞു: "നിങ്ങൾ ഈ ചന്ദ്രനെ കാണുന്നത് പോലെ നിങ്ങളുടെ രക്ഷിതാവിനെ കാണുന്നതാണ്. അവനെ കാണുന്നതിൽ നിങ്ങൾക്ക് യാതൊരു പ്രയാസവുമുണ്ടായിരിക്കുന്നതല്ല. സൂര്യൻ ഉദിക്കുന്നതിന് മുൻപുള്ള നമസ്കാരവും സൂര്യൻ അസ്തമിക്കുന്നതിന് മുൻപുള്ള നമസ്കാരവും നഷ്ടപ്പെടാതെ സൂക്ഷിക്കാൻ സാധിക്കുമെങ്കിൽ നിങ്ങൾ അപ്രകാരം ചെയ്യുക. മറ്റൊരു നിവേദനത്തിൽ "പതിനാലാം രാവിലെ പൂർണ്ണചന്ദ്രനിലേക്ക് നോക്കിക്കൊണ്ട് അവിടുന്ന് പറഞ്ഞു." എന്നാണുള്ളത്.
സ്വഹീഹ് - ബുഖാരിയും മുസ്ലിമും ഉദ്ധരിച്ചത്

വിശദീകരണം

ജരീർ ബ്നു അബ്ദില്ല അൽ ബജലി -رَضِيَ اللَّهُ عَنْهُ- പറയുന്നു: സ്വഹാബികൾ നബി -ﷺ- യോടൊപ്പമായിരുന്നു. അപ്പോൾ അവിടുന്ന് പതിനാലാം രാവിലെ പൂർണ്ണചന്ദ്രനിലേക്ക് നോക്കിയ ശേഷം പറഞ്ഞു: "നിങ്ങൾ ഈ ചന്ദ്രനെ കാണുന്നത് പോലെ നിങ്ങളുടെ രക്ഷിതാവിനെ കാണുന്നതാണ്." അതായത് ഉയിർത്തെഴുന്നേൽപ്പിന്റെ നാളിൽ സ്വർഗത്തിൽ വെച്ച് മുഅ്മിനീങ്ങൾ അല്ലാഹുവിനെ കാണുന്നതാണ്. പൗർണ്ണമി നാളിൽ പൂർണ്ണചന്ദ്രനെ കാണുന്നത് പോലെ എന്ന് പറഞ്ഞതിന്റെ ഉദ്ദേശം അല്ലാഹു ചന്ദ്രനെ പോലെയാണ് എന്നല്ല. കാരണം അല്ലാഹു; അവനെ പോലെ മറ്റൊന്നും തന്നെയില്ല. അവൻ എല്ലാറ്റിനേക്കാളും മഹത്വമുടയവും പ്രതാപമുള്ളവനുമത്രെ. മറിച്ച് ഇവിടെ ഉദ്ദേശിക്കുന്നത് മനുഷ്യരുടെ കാഴ്ചയെ ഉപമിക്കലാണ്. അതായത് നാം ചന്ദ്രനെ യഥാർത്ഥ രൂപത്തിൽ - യാതൊരു അവ്യക്തതയുമില്ലാതെ - കാണുന്നത് പോലെ, അല്ലാഹുവിനെ നമ്മുടെ കണ്ണുകൾ കൊണ്ട് യാതൊരു അവ്യക്തതയുമില്ലാതെ, യാഥാർഥ്യമുള്ള നിലക്ക് കാണുന്നതാണ്. ശ്രദ്ധിക്കുക! ഇവിടെ കാഴ്ചയെയാണ് താരതമ്യം ചെയ്തത്; അല്ലാതെ കാണപ്പെടുന്നതിനെയല്ല. സ്വർഗക്കാർക്ക് ലഭിക്കുന്ന ഏറ്റവും ആസ്വാദ്യകരവും മനോഹരവുമായ സുഖാനുഗ്രഹം അല്ലാഹുവിന്റെ മുഖത്തേക്ക് നോക്കുക എന്നതായിരിക്കും. അതിന് തുല്ല്യമാകുന്ന മറ്റൊന്നും തന്നെയില്ല. അല്ലാഹുവിനെ നാം കാണുന്നതാണ് എന്ന കാര്യം ഓർമ്മപ്പെടുത്തിയ ശേഷം നബി -ﷺ- പറയുന്നു: "സൂര്യൻ ഉദിക്കുന്നതിന് മുൻപുള്ള നമസ്കാരവും സൂര്യൻ അസ്തമിക്കുന്നതിന് മുൻപുള്ള നമസ്കാരവും നഷ്ടപ്പെടാതെ സൂക്ഷിക്കാൻ സാധിക്കുമെങ്കിൽ നിങ്ങൾ അപ്രകാരം ചെയ്യുക." ഇവിടെ നഷ്ടപ്പെടാതെ സൂക്ഷിക്കുക എന്നത് കൊണ്ടുള്ള ഉദ്ദേശം ഈ രണ്ട് നമസ്കാരങ്ങൾ പൂർണ്ണമായി നിർവ്വഹിക്കുക എന്നതാണ്. നമസ്കാരം ജമാഅത്തായി നിർവ്വഹിക്കുക എന്നത് അതിൽ പെട്ടതാണ്. സുബഹ് നമസ്കാരവും, അസ്വർ നമസ്കാരവും സൂക്ഷ്മതയോടെ ശ്രദ്ധിക്കുന്നത് അല്ലാഹുവിന്റെ മുഖം ദർശിക്കുക എന്ന അനുഗ്രഹം ലഭിക്കാനുള്ള കാരണങ്ങളിൽ പെട്ടതാണ്.