হাদীছ: আল্লাহৰ ৰাছুলে যি হাৰাম কৰিছে নিশ্চিতভাৱে সেইটো সেইদৰেই হাৰাম যিদৰে আল্লাহে হাৰাম কৰিছে।

عن المقدام بن معدِيْكَرِب قال: قال رسول الله صلى الله عليه وسلم: (ألا هل عسى رجلٌ يبلغه الحديث عني وهو متكئ على أريكته فيقول: بيننا وبينكم كتاب الله، فما وجدنا فيه حلالًا استحللناه، وما وجدنا فيه حرامًا حرمناه. وإن ما حرم رسول الله كما حرم الله).
[صحيح] - [رواه أبو داود والترمذي وابن ماجه]

মিক্বদাম ইবনে মা'দীকাৰিব ৰাদ্বিয়াল্লাহু আনহুৰ পৰা বৰ্ণিত, ৰাছুলুল্লাহ চাল্লাল্লাহু আলাইহি অছাল্লামে কৈছেঃ সাৱধান! অচিৰেই এনেকুৱা মানুহৰ আৱিৰ্ভাৱ হ’ব পাৰে, যাৰ ওচৰত মোৰ হাদীছ গৈ পালে সি নিজৰ চকীত আউজি বহি ক’ব, আমাৰ আৰু তোমালোকৰ মাজত আছে আল্লাহৰ কিতাব, ইয়াৰ মাজত আমি যিটোক হালাল বুলি পাম সেইটোকহে হালাল বুলি মানি লম আৰু ইয়াৰ মাজত আমি যিটোক হাৰাম বুলি পাম সেইটোক হাৰাম বুলি মানি লম। (সাৱধান) জানি থোৱা! আল্লাহৰ ৰাছুলে যি হাৰাম কৰিছে নিশ্চিতভাৱে সেইটো সেইদৰেই হাৰাম যিদৰে আল্লাহে হাৰাম কৰিছে।
ছহীহ - ইয়াক ইবনু মাজাহে বৰ্ণনা কৰিছে

ব্যাখ্যা

আল্লাহৰ ৰাছুল চাল্লাল্লাহু আলাইহি অছাল্লামে এই হাদীছটোত সেইসকল লোকৰ কথা উল্লেখ কৰিছে যিসকলে হাদীছক সন্মান নকৰে। সিহঁতৰ মাজৰ কিছুমানে হাদীছক প্ৰমাণ হিচাপে গ্ৰহণ নকৰে আৰু ইয়াৰ প্ৰতি মনোযোগো নিদিয়ে। এনেকুৱা লোকৰ ওচৰত যেতিয়া কোনো হাদীছ উপস্থাপন কৰা হয় তেতিয়া সি নিজৰ চকীত আউজি বহি থকা অৱস্থাতে অস্বীকাৰ কৰে আৰু এই বুলি কয় যে, আমাৰ আৰু তোমালোকৰ মাজত কোৰআন আছে, ইয়াত আমি যিটোক হালাল বুলি পাম সেইটোকে হালাল বুলি মানিম আৰু ইয়াত যিটো আমি হাৰাম বুলি পাম সেইটোকে হাৰাম বুলি মানিম। এতেকে তাৰ ওচৰত উপস্থাপন কৰা হাদীছৰ প্ৰতি সি আমলো নকৰে আৰু বিশ্বাসো নকৰে। সি নিজৰ ধাৰণা অনুসাৰে কেৱল কোৰআনকেই উৎস বুলি মানে। প্ৰকৃততে সি যদি কোৰআনৰ প্ৰতি আমল কৰিলেহেঁতেন তেন্তে নিশ্চয় হাদীছৰ প্ৰতি আমল কৰিলেহেঁতেন। কিয়নো কোৰআনে নবীৰ অনুসৰণৰ আদেশ দিয়ে। এই কথাও জনা উচিত যে, যিসকল লোকৰ জৰিয়তে আমি কোৰআন পাইছোঁ সেইসকল লোকেই আমালৈ হাদীছ বৰ্ণনা কৰিছে। হাদীছটোৰ বাকী অংশত তেখেত চাল্লাল্লাহু আলাইহি অছাল্লামে কৈছে, আল্লাহে যি হাৰাম কৰিছে আৰু ৰাছুলে যি হাৰাম কৰিছে, দুয়োটাই সমান পৰ্যায়ৰ হাৰাম। ৰাছুলে হাৰাম কৰিছে মানে সেইটোক আল্লাহে হাৰাম কৰিছে। কাৰণ তেখেতে আল্লাহৰ বাৰ্তা পৌঁচাই দিবলৈহে আগমন কৰিছিল, তেখেতে নিজৰ মনে বিচৰা একো কোৱা নাছিল।