Hadith: “អស្ចារ្យណាស់កិច្ចការរបស់អ្នកមានជំនឿ! ការពិត កិច្ចការរបស់គេទាំងអស់សុទ្ធតែល្អ ហើយប្រការនេះមិនមានចំពោះអ្នកណាម្នាក់ក្រៅពីអ្នកមានជំនឿឡើយ

عَنْ صُهَيْبٍ رضي الله عنه قَالَ: قَالَ رَسُولُ اللهِ صَلَّى اللهُ عَلَيْهِ وَسَلَّمَ:
«عَجَبًا لِأَمْرِ الْمُؤْمِنِ، إِنَّ أَمْرَهُ كُلَّهُ خَيْرٌ، وَلَيْسَ ذَاكَ لِأَحَدٍ إِلَّا لِلْمُؤْمِنِ، إِنْ أَصَابَتْهُ سَرَّاءُ شَكَرَ، فَكَانَ خَيْرًا لَهُ، وَإِنْ أَصَابَتْهُ ضَرَّاءُ صَبَرَ، فَكَانَ خَيْرًا لَهُ».
[صحيح] - [رواه مسلم] - [صحيح مسلم: 2999]

អំពី ស្ហូហ៊ែប رضي الله عنه បាននិយាយថា៖ រ៉ស៊ូលុលឡោះ ﷺ លោកបានមានប្រសាសន៍ថា៖
“អស្ចារ្យណាស់កិច្ចការរបស់អ្នកមានជំនឿ! ការពិត កិច្ចការរបស់គេទាំងអស់សុទ្ធតែល្អ ហើយប្រការនេះមិនមានចំពោះអ្នកណាម្នាក់ក្រៅពីអ្នកមានជំនឿឡើយ។ ប្រសិនបើប្រការល្អកើតមានចំពោះគេ គេថ្លែងអំណរគុណ។ ដូចនេះ វាជាការប្រសើរសម្រាប់រូបគេ។ ហើយប្រសិនបើប្រការអាក្រក់កើតមានចំពោះគេ គេអត់ធ្មត់។ ដូចនេះវាក៏ជាការល្អប្រសើរសម្រាប់គេដែរ”។
[صحيح] - [رواه مسلم] - [صحيح مسلم - 2999]

Explanation

ណាពី ﷺ មានការភ្ញាក់ផ្អើលក្នុងចិត្តចំពោះកិច្ចការរបស់អ្នកមានជំនឿ និងស្ថានភាពរបស់គេ នោះក៏ព្រោះតែស្ថានភាពទាំងអស់របស់គេ គឺសុទ្ធតែនាំមកនូវប្រការល្អទាំងអស់ ហើយប្រការនេះមិនមានសម្រាប់នរណាម្នាក់ក្រៅពីអ្នកជំនឿឡើយ។ ប្រសិនបើរូបគេទទួលបានប្រការល្អ រូបគេថ្លែងអំណរគុណអល់ឡោះជាម្ចាស់ចំពោះប្រការនោះ។ ដូចនេះ រូបគេនឹងទទួលបានផលបុណ្យសម្រាប់ការដឹងគុណនោះ។ ហើយប្រសិនបើរូបគេជួបប្រទះរឿងមិនល្អ រូបគេអត់ធ្មត់ និងរំពឹងទុកផលបុណ្យពីអល់ឡោះ នោះរូបគេនឹងទទួលបានផលបុណ្យសម្រាប់ការអត់ធ្មត់នោះ។ ដូច្នេះ រូបគេទទួលបានផលបុណ្យនៅគ្រប់ស្ថានភាពទាំងអស់។

Benefits from the Hadith

1. ឧត្តមភាពនៃការថ្លែងអំណរគុណអល់ឡោះចំពោះប្រការល្អ និងការអត់ធ្មត់ចំពោះប្រការអាក្រក់ដែលរូបគេជួបប្រទះ។ ជនណាដែលធ្វើបែបនេះ នោះគេនឹងទទួលបានសេចក្តីល្អនៅក្នុងឋានទាំងពីរ(លោកិយ និងបរលោក)។ តែជនណាដែលមិនដឹងគុណអល់ឡោះចំពោះឧបការគុណដែលខ្លួនទទួលបាន និងមិនអត់ធ្មត់ចំពោះគ្រោះដែលខ្លួនជួបប្រទះ នោះគេនឹងបាត់បង់ផលបុណ្យ ហើយនិងទទួលបានបាបកម្មជាមិនខាន។
2. បញ្ជាក់ពីគុណតម្លៃនៃសេចក្តីជំនឿ ហើយពិតណាស់ ផលបុណ្យដែលគេអាចទទួលបានក្នុងគ្រប់ស្ថានភាពនោះ គឺមានតែសម្រាប់អ្នកមានជំនឿប៉ុណ្ណោះ។
3. ការថ្លែងអំណរគុណអល់ឡោះពេលទទួលបានប្រការល្អ និងការអត់ធ្មត់ពេលជួបប្រទះរឿងមិនល្អ គឺជាលក្ខណៈរបស់អ្នកជំនឿ។
4. ការមានជំនឿចំពោះការកំណត់ព្រេងវាសនារបស់អល់ឡោះជាម្ចាស់(កទ៏ កទើរ)ធ្វើឱ្យអ្នកមានជំនឿពេញចិត្តទាំងស្រុងចំពោះស្ថានភាពទាំងអស់របស់ខ្លួន ផ្ទុយពីអ្នកមិនមានជំនឿដែលតែងតែខឹងសម្បាពេលជួបគ្រោះ។ ហើយពេលដែលខ្លួនទទួលបានឧបការគុណពីអល់ឡោះវិញ គឺរូបគេតែងរវល់នឹងប្រការនោះ រហូតភ្លេចខ្លួនពីការគោរពប្រតិបត្តិអល់ឡោះ ហើយថែមទាំងប្រើវាក្នុងការប្រព្រឹត្តអំពើល្មើសនឹងទ្រង់ថែមទៀត។