Hədis: “Möminin halı necə də təəccüblüdür, onun hər halı xeyirdir və bu, mömindən başqa heç kəsə aid deyil

عَنْ صُهَيْبٍ رضي الله عنه قَالَ: قَالَ رَسُولُ اللهِ صَلَّى اللهُ عَلَيْهِ وَسَلَّمَ:
«عَجَبًا لِأَمْرِ الْمُؤْمِنِ، إِنَّ أَمْرَهُ كُلَّهُ خَيْرٌ، وَلَيْسَ ذَاكَ لِأَحَدٍ إِلَّا لِلْمُؤْمِنِ، إِنْ أَصَابَتْهُ سَرَّاءُ شَكَرَ، فَكَانَ خَيْرًا لَهُ، وَإِنْ أَصَابَتْهُ ضَرَّاءُ صَبَرَ، فَكَانَ خَيْرًا لَهُ».
[صحيح] - [رواه مسلم] - [صحيح مسلم: 2999]

Suheybdən (Allah ondan razı olsun) rəvayət edilir ki, Allahın Rəsulu (Allahın salavatı və salamı onun üzərinə olsun) belə dedi:
“Möminin halı necə də təəccüblüdür, onun hər halı xeyirdir və bu, mömindən başqa heç kəsə aid deyil. Əgər ona bir sevinc toxunsa, şükür edər və bu onun üçün xeyir olar. Əgər başına bir müsibət gəlsə, səbir edər və bu onun üçün xeyir olar”.
[Səhih] - [Muslim rəvayət etdi] - [Sahihu Muslim - 2999]

Şərh (izah)

Allah Rəsulu (Allahın salavatı və salamı onun üzərinə olsun) möminin vəziyyətinə və halına gözəl şəkildə təəccüb edir. Çünki onun hər bir halı xeyirdir və bu mömindən başqa heç kəs üçün belə deyil. Əgər ona bir sevinc toxunsa, buna görə Allaha şükür edər və şükrünə görə əcr qazanar. Əgər başına bir müsibət gəlsə, səbr edər və mükafatını Allahdan umar və səbr etdiyinə görə əcr qazanar. Beləliklə o, hər bir halında savab qazanar.

Hədisin faydalarından

1. Yaxşı günlərə şükür etmək və çətinliyə səbr etməyin fəziləti. Hər kim bunu edərsə, hər iki dünyanın xeyrinə nail olar. Hər kim nemətə şükr və müsibətə səbr etməzsə, savabdan məhrum olar və günah qazanar.
2. İmanın fəziləti və hər bir halda mükafatın yalnız iman sahiblərinə aid olması.
3. Yaxşı günlərdə şükr etmək, sıxıntıda isə səbr etmək möminlərin xüsusiyyətlərindəndir.
4. Özünə bir zərər toxunduğu zaman daim qəzəb içində olan kafirdən fərqli olaraq, Allahın qəza və qədərinə iman, mömini bütün hallarında tam razı salır. Kafir Allahdan bir nemət əldə edərsə, bu onu nəinki Allaha itaətdən yayındırar, üstəlik bu neməti Ona asi olmağa sərf edər.