عَنِ ابْنِ عَبَّاسٍ، قَالَ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ: «إِنَّ اللَّهَ يُحِبُّ أَنْ تُؤْتَى رُخَصُهُ، كَمَا يُحِبُّ أَنْ تُؤْتَى عَزَائِمُهُ».
[صحيح] - [رواه ابن حبان]
المزيــد ...

အစ်ဗ်နုအဗ္ဗာစ်(ရဿွိယလ္လာဟုအန်ဟု)က ဆင့်ပြန်ခဲ့သည်။ အလ္လာဟ်အရှင်မြတ်၏ ရစူလ်တမန်တော် (ဆွလ္လလ္လာဟုအလိုင်းဟိဝစလ္လမ်)မိန့်ကြားတော်မူသည်။ ဧကန်အမှန်ပင် အလ္လာဟ်အရှင်မြတ်သည် မိမိသတ်မှတ်ထားသည့် (ဖရ်ဿွ်) တာဝန်များကို လိုက်နာကျင့်သုံးခြင်းအား နှစ်သက်တော်မူသကဲ့သို့ မိမိလျော့ပေါ့ပေးထားသည့် ခံစားခွင့်ကို ကျင့်သုံးခြင်းအား နှစ်သက်တော်မူသည်။
ဤဟဒီးဆ်သည် ဆွဟီးဟ် အဆင့်ရှိသည်။ - အိဗ်နုဟိဗ်ဗာန် ဆင့်ပြန်ခဲ့သည်။

ရှင်းလင်းချက်

တမန်တော် (ဆွလ္လလ္လာဟုအလိုင်းဟိဝစလ္လမ်) မိန့်ကြားတော်မူခဲ့သည်မှာ အလ္လာဟ်အရှင်မြတ်သည် မိမိ၏ကျေးကျွန်များက မိမိလျော့ပေါ့ပေးထားသည့် ခံစားခွင့်များကို လက်ခံကျင့်သုံးခြင်းအား နှစ်သက်တော်မူသည်။ ခံစားခွင့်ဆိုသည်မှာ တရားဝင်အကြောင်းပြချက်ရှိသည့်အတွက် သာသနာကို လိုက်နာကျင့်သုံးရန်တာဝန်ရှိသူအပေါ်၌ လွယ်ကူမှုရှိစေရန် အမိန့်ပညတ်ချက်များ၊ ခဝပ်ကိုးကွယ်မှုများ၌ လျော့ပေါ့ပေးထားခြင်းကို ဆိုလိုသည်။ထိုအပေါ် အလ္လာဟ်အရှင်မြတ် နှစ်သက်ရခြင်းမှာ ထိုသို့လိုက်နာကျင့်သုံးသူသည် မာနတရားမရှိခြင်းနှင့် ရှရီအဟ်တရားတော်က ခွင့်ပြုထားသောအရာကို မငြင်းပယ်ဘဲ ခွင့်ပြုထားသည့်အတိုင်း လိုက်နာကျင့်သုံးခြင်းတို့ကြောင့်ဖြစ်သည်။ ထိုသို့ကျင့်သုံးခြင်း၌ ကျေးကျွန်များအတွက် လွယ်ကူသက်သာမှုရှိသည်။ အလ္လာဟ်အရှင်မြတ်သည် မိမိ၏ကျေးကျွန်များက ဖရ်ဿွ်တာဝန်များကို လိုက်နာကျင့်သုံးခြင်းအား နှစ်သက်သကဲ့သို့ လျော့ပေါ့ပေးထားမှုများကို လိုက်နာကျင့်သုံးခြင်းအား နှစ်သက်တော်မူသည်။ အဘယ်ကြောင့်ဆိုသော် ဖရ်ဿွ်တာဝန်များနှင့် ပတ်သက်၍ဖြစ်စေ၊ လျော့ပေါ့ပေးမှုများနှင့်ပတ်သက်၍ဖြစ်စေ အလ္လာဟ်အရှင်မြတ်၏ အမိန့်တော်သည် တစ်ခုတည်းပင်ဖြစ်သည်။ ဤဟဒီးဆ်တော်သည် အောက်ပါအာယသ်တော်၏ အလိုသဘောအတိုင်းပင်ဖြစ်သည်။ (အလ္လာဟ်အရှင်မြတ်သည် အသင်တို့အတွက် လွယ်ကူမှုကိုသာ လိုလားတော်မူပြီး အသင်တို့အတွက် ခက်ခဲမှုကို လိုလားတော်မမူပေ။) ကုရ်အာန် (၂:၁၈၅) ခံစားခွင့်အဖြစ် လျော့ပေါ့ပေးထားသည့် ဥပမာများမှာ- ခြေစွပ်ပေါ်တွင် ‘မစဟ်’ပွတ်သပ်ခြင်း၊ ခရီးတွင် လေးရကသ်ဆွလာသ်များကို နှစ်ရကသ်သာ ဆောက်တည်ရခြင်း၊ မကျန်းမာသည့်အခါ ဆွိယာမ် မစောင့်ထိန်းဘဲနေခွင့်ရှိခြင်း အစရှိသည်တို့ဖြစ်သည်။

ဘာသာပြန်: အင်္ဂလိပ် ပြင်သစ် စပိန် တူရကီ အုရ်ဒူ အင်ဒိုနီးရှား ဘော့စနီးယား ဘင်္ဂလီ တရုတ် ဖါရစီ(ပါရှန်း) ဟင်ဒီ ဗီယက်နမ် ဆင်ဟာလီ ဝီဂါ ကာ့ဒ် ဟောက်ဆာ မလေးရာလမ် တေလဂူ ဆွာဟီလီ တမီးလ် ထိုင်း ပါရှ်တို အာသံ အယ်လ်ဘေးနီးယန် السويدية الأمهرية الهولندية الغوجاراتية الدرية
ဘာသာပြန်များကို ကြည့်ရှုရန်

ဟဒီးဆ်မှ သိမှတ်ဖွယ်ရာများ

  1. သာသနာရေးကိစ္စများကို ခက်ခဲအောင်မပြုလုပ်ရန် သတိပေးတားမြစ်ထားသည်။ ဧကန်အမှန်ပင် သာသနာသည် လွယ်ကူသည်။
  2. ခိုင်လုံသည့် အကြောင်းပြချက်ရှိသဖြင့် လျော့ပေါ့ပေးထားသည့်အတိုင်း လိုက်နာကျင့်သုံးနေကြသည့် အင်အားချည့်နဲ့သူများ၏ စိတ်နှလုံးသားများကို နှစ်သိမ့်ပေးထားသည်။
  3. အလ္လာဟ်အရှင်မြတ်က မိမိကျေးကျွန်များအပေါ်တွင်ထားရှိသည့် ကရုဏာတော်ကိုဖော်ပြထားသည်။ အလ္လာဟ်အရှင်မြတ်သည် ရှရီအဟ် တရားတော်က ခွင့်ပြုထားသည့် ခံစားခွင့်အတိုင်းကျင့်သုံးခြင်းကို နှစ်သက်တော်မူသည်။
  4. လျော့ပေါ့ပေးထားသည့် နေရာများ၌ ထိုအတိုင်း ကျင့်သုံးရန်တောင်းဆိုထားသည်။ ထို့အတူ တာဝန်များနှင့် ပတ်သက်၍လည်း တာဝန်ရှိသည့်အတိုင်းလိုက်နာကျင့်သုံးရမည်။ ဤသည်ကို မလိုက်နာသူသည် အလ္လာဟ်အရှင်မြတ်၏ အမိန့်မနာခံသူ၊ အပြစ်ကျူးလွန်သူပင်ဖြစ်သည်။
  5. အစ္စလာမ်သာသနာတော်တွင် ‘ရုခ်ဆွသ်’ကို လက်ခံအတည်ပြုထားသည်။ ယင်းသည် ခိုင်လုံသော အကြောင်းပြချက်၊ လျော့ပေါ့ပေးခြင်း၊ လွယ်ကူစေခြင်း၊ သာသနာကို လိုက်နာကျင့်သုံးသူပေါ်၌ ခက်ခဲမှုကို ဖယ်ရှားပေးခြင်း စသည်တို့အပေါ်တွင် အခြေခံထားသည်။
  6. ချစ်ခင်နှစ်သက်ခြင်းသည် အလ္လာဟ်အရှင်မြတ်၏ ဂုဏ်တော်များအနက်မှ ဂုဏ်တော်တစ်ခုဖြစ်သည်။ ယင်းဂုဏ်တော်သည် ချို့ယွင်းမှုအပေါင်းမှ သန့်ရှင်းစင်ကြယ်တော်မူသော အလ္လာဟ်အရှင်မြတ်နှင် သင့်လျော်သည့်အတိုင်း အရှင်မြတ်တွင် ရှိတော်မူသည်။ မနှစ်သက်ခြင်းသည်လည်း ထိုအတိုင်းပင်ဖြစ်သည်။