Ҳадис: Ҳар бир балоғатга етган инсон жума куни ғусл қилиши, мисвок ишлатиши ва топса атир суртиши вожибдир

عَنْ عَمْرِو بْنُ سُلَيْمٍ الأَنْصَارِيُّ قَالَ: أَشْهَدُ عَلَى أَبِي سَعِيدٍ قَالَ: أَشْهَدُ عَلَى رَسُولِ اللَّهِ صَلَّى اللهُ عَلَيْهِ وَسَلَّمَ قَالَ:
«الغُسْلُ يَوْمَ الجُمُعَةِ وَاجِبٌ عَلَى كُلِّ مُحْتَلِمٍ، وَأَنْ يَسْتَنَّ، وَأَنْ يَمَسَّ طِيبًا إِنْ وَجَدَ».
[صحيح] - [متفق عليه] - [صحيح البخاري: 880]

Амр ибн Сулайм Ансорий разияллоҳу анҳудан ривоят қилинади: Гувоҳлик бераманки, Абу Саид шундай дедилар: «Гувоҳлик бераманки, Расулуллоҳ соллаллоҳу алайҳи ва саллам шундай дедилар:
«Ҳар бир балоғатга етган инсон жума куни ғусл қилиши, мисвок ишлатиши ва топса атир суртиши вожибдир».
[Тўғри матн] - [Муттафақун алайҳ] - [Саҳиҳул Бухорий - 880]

Изоҳ

Набий соллаллоҳу алайҳи ва саллам жума куни жума намозини ўқиш вожиб бўлган, балоғатга етган эркак киши ғусл олиши, тишларини мисвок ёки шу каби нарса билан тозалаши, хушбўй ҳид таратадиган атир сепиши лозим эканлигини хабар бердилар.

Ҳадиснинг фойдалари

1. Ҳар бир балоғатга етган мусулмон эркак ғусл олиши мустаҳаб экани таъкидланмоқда.
2. Мусулмон ёмон ҳидларни кетказиб тоза юриши шаръан талаб қилинган.
3. Жума кунини улуғлаш ва унга тайёрланиш.
4. Жума куни мисвок ишлатиш мустаҳаб экани таъкидланмоқда.
5. Жумага боришдан олдин бирор атир билан хушбўйланиш мустаҳаб.
6. Аёл киши уйидан намоз ёки шу каби нарсалар учун чиқса бошқа ҳадислар далолат қилгани каби хушбўйланиши жоиз эмас, ҳаром.
7. Балоғатга етишнинг ўз аломатлари бор. Учтасида аёл ҳам эркак ҳам иштирок этади. Биринчиси: Ўн беш ёшга тўлиш. Иккинчи: Фарж атрофига қалин туклар чиқиши.
8. Учинчи: Иҳтилом ёки шаҳват сабабли мани тушиши. Тўртинчи аломат эса аёлларга тегишли, у ҳам бўлса: ҳайз. Агар аёл киши ҳайз кўрса балоғатга етган бўлади.