Hadiis: Adam-biig yagsa maam, la ka sõmb ne-a t'a rag n yags Maam ye, a tʋʋ Maam, la rẽ rag n ka sõmb ne-a ye

عَنْ أَبِي هُرَيْرَةَ رَضِيَ اللَّهُ عَنْهُ:
عَنِ النَّبِيِّ صَلَّى اللهُ عَلَيْهِ وَسَلَّمَ قَالَ: «قَالَ اللَّهُ: كَذَّبَنِي ابْنُ آدَمَ وَلَمْ يَكُنْ لَهُ ذَلِكَ، وَشَتَمَنِي وَلَمْ يَكُنْ لَهُ ذَلِكَ، فَأَمَّا تَكْذِيبُهُ إِيَّايَ فَقَوْلُهُ: لَنْ يُعِيدَنِي، كَمَا بَدَأَنِي، وَلَيْسَ أَوَّلُ الخَلْقِ بِأَهْوَنَ عَلَيَّ مِنْ إِعَادَتِهِ، وَأَمَّا شَتْمُهُ إِيَّايَ فَقَوْلُهُ: اتَّخَذَ اللَّهُ وَلَدًا وَأَنَا الأَحَدُ الصَّمَدُ، لَمْ أَلِدْ وَلَمْ أُولَدْ، وَلَمْ يَكُنْ لِي كُفْؤًا أَحَدٌ».
[صحيح] - [رواه البخاري] - [صحيح البخاري: 4974]

Yii a Abɩɩ Hʋrayrat nengẽ (Wẽnd yard be a yĩnga):
Yii Nabiyaamã nengẽ (Wẽnd pʋʋsg lɑ A tɩlgr be ɑ yĩngɑ) a yeelame: «Wẽnd yeelame: Adam-biig yagsa maam, la ka sõmb ne-a t'a rag n yags Maam ye, a tʋʋ Maam, la rẽ rag n ka sõmb ne-a ye, la a sẽn yags Maamã, yaa a sẽn yeele: "Wẽnd kõn n tol n lebs maam wala A sẽn rag n naan maamã ye". La rẽeneg naanegã ne Maam yẽ naana ka yɩɩd lebs-n-naanã ye. La sã n yaa a sẽn tʋ Maamã, yaa a sẽn yeele: "Wẽnd tara biiga", La Mam yaa M Yembre. N yaa Tikdɑ, M ka roge, b ka rog-Ma, M leb n ka tar mak-n-taag baa a ye».
[Naṣʋn Ṣahɩɩhʋn (Gom-sikdem sẽn manege)] - [A Al-Bʋẖaariy n togs-a] - [Ṣahɩɩh Al-Bʋẖaary - 4974]

bilgrã

Nɑbiyɑɑã (Wẽnd pʋʋsg la A tɩlgr be a yĩnga) a vẽnegdame n wilgd Hadiis Ƙʋdsy pʋgẽ, tɩ Wẽnde, (A Naam yɩlg n zẽke) A kõo kibare, sẽn kẽed ne lagem-n-taarã kɩfr-rãmba, tɩ b yagsda Wẽnde, la b sɩfd-A ne boogr la zamse, la rẽ rag n ka sõmb ne-b ye.
La sã n yaa b sẽn yagsd Wẽndã: yaa b sẽn yẽgend tɩ Wẽnd ka na n leb n tõog n lebs bãmb lae b kũumã poorẽ ye, wala A sẽn rag n naan bãmb rẽenem tɩ b rag n ka beẽ wã, tɩ Wẽnd loek-b n yeele: tɩ Naab ning sẽn maan naanegã zaalemã, A yaa tõoda ne A na lebs-ba, yẽ lebsgã n pʋs n yaa naana n yɩɩda. baa tɩ mikame tɩ sã n yaa ne Wẽnd nengẽ, fãa gilli zema taaba, naanegã la lebs n leb n yik-ba, bala Wẽnd yaa tõod ne bũmbã fãa gilli.
La sã n yaa b tʋʋbã: yaa b sẽn yeele: tɩ Wẽnd tara biiga, tɩ Wẽnd loek-b n yeele, tɩ Yẽnda yaa A yembre, sẽn welg ne yel-piti wã zãnga, A Yʋyẽ la A sɩf-rãmbẽ la A tʋʋmẽ, n yɩlg n yi boogr la zanga, n yaa Tikda tikr ning sẽn ka tar tʋlsem ne ned baa a yembre, tɩ bũmbã fãa gill tar tʋlsem ne-A, A ka yɩ n yaa ned saamb ye, A ka yɩ ned baa a yembr biiga, A ka tar bilg-n-taaga, A ka tar mak-n-taaga makr pʋgẽ, (A Naam yɩlg yã).

Sẽn be Hɑdiisã yõod-rãmbẽ

1. Yaa tõog sẽn pid tablgo ne Wẽnde, (A Naam zẽkame).
2. Yaa kũumã poorẽ yikr tablgo.
3. Wilgdame tɩ ned ning sẽn kɩɩsa yikrã a kɩflame, maa ned ning sẽn yeel tɩ Wẽnde, (A Naam zẽkame), tara biiga, a kɩflame.
4. Wẽnde, (A Naam zẽk yã), A ka tar bilg-n-taare, a ka tar mak-n-taare.
5. Wilgda Wẽnd sugrã sẽn yalem to-to, (A Naam yɩlgame), la A sẽn yaoond kɩfr-rãmbã, tɩ raar ninga b na tuub la b leb Wẽnd nengẽ.