Хадис: Аллахым, карызга батуудан, душмандын үстөмдүк кылуусунан жана табалоосунан сактоону Өзүңдөн суранам

عَنْ عَبْدِ اللَّهِ بْنِ عَمْرِو بْنِ الْعَاصِ رضي الله عنهما أَنَّ رَسُولَ اللَّهِ صَلَّى اللهُ عَلَيْهِ وَسَلَّمَ كَانَ يَدْعُو بِهَؤُلَاءِ الْكَلِمَاتِ:
«اللَّهُمَّ إِنِّي أَعُوذُ بِكَ مِنْ غَلَبَةِ الدَّيْنِ، وَغَلَبَةِ الْعَدُوِّ، وَشَمَاتَةِ الْأَعْدَاءِ».
[صحيح] - [رواه النسائي وأحمد] - [سنن النسائي: 5475]

Абдуллах бин Амр бин Аас (аларга Аллах ыраазы болсун) айтат: Аллахтын элчиси (ага Аллахтын тынчтыгы жана мактоосу болсун) төмөнкү сөздөрдү айтып дуба кылчу:
"Аллахым, карызга батуудан, душмандын үстөмдүк кылуусунан жана табалоосунан сактоону Өзүңдөн суранам".
[Сахих (ишенимдүү)] - [Ан-Насааи жана Ахмад жазып калтырган] - [Сунан ан-Насааи - 5475]

Түшүндүрмө

Пайгамбарыбыз (ага Аллахтын тынчтыгы жана мактоосу болсун) бир канча иштен сактоону Аллахтан суранган:
Биринчиси: "Аллахым, Сенден суранамын" Сенден башкадан суранбайм "карызга батып кетүүдөн сакта" карыздын оордугунан, кыжаалатчылыгынан, кайгы-капасынан сакта. Карыздан кутулууга жардам берүүңдү суранам.
Экинчиси: "душмандын үстөмдүгүнөн" басмырлоосунан жана башчылык кылуусунан сакта. Душмандын зыянынан сактооңду жана жеңишке жеткирүүңдү суранам.
Үчүнчү: "душмандын таба кылуусунан" мусулмандардын башына түшкөн балээ, кыйынчылыкка кубанып карап туруусунан сакта.

Хадистин пайдалары

1. Карыз ж.б.у.с. адамды ибадаттан алагды кыла турган, кыжаалатчылыкка сала турган иштердин баарынан сактоону Аллахтан сурануу керек.
2. Жалпы карыздар эч нерсе эмес, карыздын жаманы аны төлөгөнгө чамасы жок болуп калганы. Мына ушул карыз карызга батуу болуп эсептелет.
3. Адам баласы шылдың боло турган жана өзүнө айып тагыла турган иштерден алыс болушу керек.
4. Кыйынчылык болгон учурда каапырлардын ыймандууларга болгон табасын, душмандыгын баяндоо.
5. Адамдын башына түшкөн кыйынчылыгына душманынын табалап, сүйүнүүсү адамдын кыйынчылыгын ого бетер күчөтөт.