Hadith: “ថ្ងៃដ៏ល្អបំផុតដែលព្រះអាទិត្យរះលើ គឺថ្ងៃសុក្រ(ថ្ងៃជុមអាត់)។

عَنْ أَبِي هُرَيْرَةَ رضي الله عنه أَنَّ النَّبِيَّ صَلَّى اللهُ عَلَيْهِ وَسَلَّمَ قَالَ:
«خَيْرُ يَوْمٍ طَلَعَتْ عَلَيْهِ الشَّمْسُ يَوْمُ الْجُمُعَةِ، فِيهِ خُلِقَ آدَمُ، وَفِيهِ أُدْخِلَ الْجَنَّةَ، وَفِيهِ أُخْرِجَ مِنْهَا، وَلَا تَقُومُ السَّاعَةُ إِلَّا فِي يَوْمِ الْجُمُعَةِ».
[صحيح] - [رواه مسلم] - [صحيح مسلم: 854]

អំពី អាពូហ៊ូរ៉យរ៉ោះ رضي الله عنه ពិតណាស់ណាពី ﷺ លោកបានមានប្រសាសន៍ថា៖
“ថ្ងៃដ៏ល្អបំផុតដែលព្រះអាទិត្យរះលើ គឺថ្ងៃសុក្រ(ថ្ងៃជុមអាត់)។ ក្នុងថ្ងៃនោះ គេបានបង្កើតណាពីអាហ្ទាំ។ នៅថ្ងៃនោះដែរ គេបានបញ្ចូលគាត់ទៅក្នុងឋានសួគ៌ ហើយនៅថ្ងៃនោះដែរ គេបានបញ្ចេញគាត់ពីឋានសួគ៌វិញ។ ហើយថ្ងៃបរលោកនឹងមិនកើតឡើងឡើយ លើកលែងតែនៅថ្ងៃសុក្រប៉ុណ្ណោះ”។
[صحيح] - [رواه مسلم] - [صحيح مسلم - 854]

Explanation

ណាពី ﷺ លោកបានប្រាប់ថា ថ្ងៃដ៏ល្អបំផុតដែលព្រះអាទិត្យរះ គឺថ្ងៃសុក្រ។ ក្នុងចំណោមលក្ខណៈពិសេសរបស់ថ្ងៃសុក្រនោះ គឺអល់ឡោះជាម្ចាស់បានបង្កើតណាពីអាហ្ទាំ អាឡៃហ៊ិស្សាឡាម ទ្រង់បានបញ្ចូលគាត់ទៅក្នុងឋានសួគ៌ និងបានបញ្ចេញគាត់ពីក្នុងឋានសួគ៌មកកាន់ផែនដីវិញ ហើយថ្ងៃបរលោកក៏មិនកើតឡើងក្រៅពីថ្ងៃសុក្រនោះដែរ។

Benefits from the Hadith

1. បញ្ជាក់ពីឧត្តមភាពនៃថ្ងៃសុក្រលើសពីថ្ងៃផ្សេងទៀតក្នុងសប្តាហ៍។
2. ជំរុញឲ្យបង្កើននូវការសាងទង្វើកុសលឲ្យបានច្រើននៅថ្ងៃសុក្រ ហើយត្រៀមខ្លួនទទួលនូវក្តីមេត្តាករុណាពីអល់ឡោះ និងចៀសឆ្ងាញពីទណ្ឌកម្មរបស់ទ្រង់។
3. ចំពោះលក្ខណៈពិសេសនៃថ្ងៃសុក្រដែលបានលើកឡើងក្នុងហាទីស្ហ មានអ្នកខ្លះយល់ថា វាពុំមែនសម្រាប់បញ្ជាក់ពីគុណតម្លៃនៃថ្ងៃសុក្រឡើយ ដ្បិតថា ការបណ្តេញណាពីអាហ្ទាំចេញពីឋានសួគ៌ និងថ្ងៃបរលោក មិនអាចចាត់ទុកថាជាគុណតម្លៃនោះឡើយ។ តែក៏មានអ្នកខ្លះទៀតយល់ថា ប្រការទាំងអស់នេះសុទ្ធតែជាគុណតម្លៃ ត្បិតការចាកចេញរបស់ណាពីអាហ្ទាំពីឋានសួគ៌ គឺជាមូលហេតុនាំឲ្យមានកូនចៅជារ៉សូល ជាណាពី និងជាមនុស្សល្អ។ រីឯថ្ងៃបរលោក គឺជាមូលហេតុដែលនាំឲ្យមនុស្សល្អទទួលបានរង្វាន់ឆាប់រហ័ស និងទទួលបានអ្វីដែលអល់ឡោះបានរៀបចំទុកសម្រាប់ពួកគេ។
4. មានលក្ខណៈពិសេសជាច្រើនផ្សេងទៀតនៃថ្ងៃសុក្រដែលមិនបានលើកឡើងក្នុងសេចក្តីរាយការណ៍ខាងលើ ក្នុងនោះ វាគឺជាថ្ងៃដែលគេទទួលយកការសារភាពកំហុស(តាវហ្ពាត់)របស់ណាពីអាហ្ទាំ ជាថ្ងៃដែលណាពីអាហ្ទាំទទួលមរណភាព ហើយក្នុងថ្ងៃនោះ មានពេលវេលាមួយដែលអ្នកមានជំនឿណាម្នាក់បានសឡាត និងបួងសួងសុំអ្វីមួយពីអល់ឡោះក្នុងពេលនោះ ទ្រង់នឹងប្រទានដល់គេ។
5. ថ្ងៃដែលល្អប្រសើរជាងគេបំផុតក្នុងមួយឆ្នាំ គឺថ្ងៃអារ៉ហ្វះ ហើយអ្នកខ្លះថា ថ្ងៃរ៉យ៉ាហាជ្ជី។ ថ្ងៃដែលល្អប្រសើរជាងគេបំផុតក្នុងមួយសប្តាហ៍ គឺថ្ងៃសុក្រ។ ចំណែកឯយប់ដែលល្អប្រសើរជាងគេបំផុត គឺយប់ឡៃឡាទុលក៏ទើរ។