حدیث: اې الله! په حقیقت کې ژوند یوازې د آخرت ژوند دی؛ نو انصارو او مهاجرینو ته بخښنه وکړه

عَنْ أَنَسِ بْنِ مَالِكٍ رَضيَ اللهُ عنه عَنِ النَّبِيِّ صَلَّى اللهُ عَلَيْهِ وَسَلَّمَ أَنَّهُ قَالَ:
«اللهُمَّ لَا عَيْشَ إِلَّا عَيْشُ الْآخِرَهْ، فَاغْفِرْ لِلْأَنْصَارِ وَالْمُهَاجِرَهْ».
[صحيح] - [متفق عليه] - [صحيح مسلم: 1805]

له انس بن مالک رضي الله عنه څخه روایت دی وایي چې: رسول الله صلی الله علیه وسلم فرمایلي:
«اې الله! په حقیقت کې ژوند یوازې د آخرت ژوند دی؛ نو انصارو او مهاجرینو ته بخښنه وکړه».
[صحيح دی] - [متفق علیه دی] - [صحيح مسلم - 1805]

تشریح

نبي صلی الله علیه وسلم خبر ورکوي چې حقیقي ژوند یوازې هغه ژوند دی چې په اخرت کې دی، د الله په رضا، رحمت او د هغه په جنت کې؛ ځکه د دنیا ژوند له منځه تلونکی دی، او د آخرت ژوند تلپاتې او باقي دی، بیا رسول الله صلی الله علیه وسلم د هغو انصارو لپاره دمغفرت، عزت او اصلاح دعا وکړه چې نبي صلی الله علیه وسلم ته یې پناه ورکړه، مرسته یې ورسره وکړه او خپلې شتمنۍ یې ورسره شریکې کړې، او هم یې هغو مهاجرینو ته دعا وکړه، چې د الله تعالی د مهربانۍ او رضایت تر لاسه کولو په موخه یې خپلې کورنۍ او شتمنۍ پرېښودې.

د حديث له ګټو څخه

1. له دنیا څخه د رسول الله صلی الله علیه وسلم ګوښه کېدل او اخرت ته مخ کول.
2. د نبي صلی الله علیه وسلم لخوا د امت هڅونه چې د دنیا لنډ مهاله شتمنیو ته زړه ښه نه کړي.
3. د مهاجرینو او انصارو د فضیلت څرګندول، ځکه وتوانېدل چې د رسول الله صلی الله علیه وسلم له خوا د مغفرت دعا ترلاسه کړي.
4. بنده دې د دنیا د لنډ مهاله ګټو په ترلاسه کولو نه خوشحاله کېږي، ځکه دنیا ژر تېرېدونکي او له کړاوونو سره ده؛ بلکې اصلي او تلپاتې ژوند یوازې د آخرت ژوند دی.