حدیث: دنیا د مؤمن لپاره زندان او د کافر لپاره جنت دی

عَنْ أَبِي هُرَيْرَةَ رَضيَ اللهُ عنه قَالَ: قَالَ رَسُولُ اللهِ صَلَّى اللهُ عَلَيْهِ وَسَلَّمَ:
«الدُّنْيَا سِجْنُ الْمُؤْمِنِ وَجَنَّةُ الْكَافِرِ».
[صحيح] - [رواه مسلم] - [صحيح مسلم: 2956]

له ابوهریره رضي الله عنه څخه روایت دی وایي چې رسول الله صلی الله علیه وسلم فرمایلي:
"دنیا د مؤمن لپاره زندان او د کافر لپاره جنت دی".
[صحیح] - [مسلم روایت کړی] - [صحیح مسلم - 2956]

تشریح

رسول الله صلی الله علیه وسلم خبر ورکوي چې دنیا د مؤمن لپاره لکه د زندان په څېر ده، ځکه چې هغه په شرعي واجباتو پابند دی، په څه چې ورته امر شوی باید عمل پرې وکړي او له څه نه چې منعه شوی باید ویې نه کړي، نو کله چې مړ شي، له دې کړاوونو راحت مومي او هغه تلپاتې نعمتونو ته ځي چې الله تعالی ورته چمتو کړي دي، خو دنیا د کافر لپاره لکه جنت ده، ځکه هغه هر څه کوي چې زړه یې وغواړي او نفس یې ورته امر کوي، خو کله چې مړ شي، د قیامت په ورځ د تل پاتې هغه عذاب سره مخ کېږي چې الله تعالی ورته چمتو کړی دی.

د حديث له ګټو څخه

1. نووي وایي: هر مؤمن په دنیا کې زنداني دی، ځکه هغه د حرامو او مکروه شیانو څخه منع شوی او په سختو طاعاتو مکلف دی، نو کله چې مړ شي، له دې حالته راحت مومي او هغه تلپاتې نعمتونو ته ځي چې الله تعالی ورته چمتو کړي دي، له بشپړې آرامۍ سره پرته له کمښت څخه، خو کافر ته د دنیا نعمتونه لږ او له کړاوونو ډک دي، خو کله چې مړ شي، د تل پاتې عذاب او ابدي بدبختۍ سره مخ کېږي.
2. سندي وایي: د (سجن المؤمن)، یعنې د مؤمن زندان، مطلب دا دی چې که څه هم هغه په نعمت کې وي، خو جنت ورته له دې غوره دی، او د (وجنة الکافر) یعنې د کافر جنت، مطلب دا دی چې که څه هم هغه په دنیا کې خوند اخلي، خو اور ورته له دې ډېر بد دی.
3. د الله تعالی سره د دنیا بې ارزښتوالی.
4. دنیا د مؤمنانو لپاره د آزموینې او امتحان ځای دی.
5. کافر خپل جنت ته په دنیا کې بیړه کوي؛ نو د آخرت د جنت او نعمتونو له محرومۍ سره جزا ورکول کېږي.