ဟဒီးဆ်: ပုဂ္ဂိုလ်သုံးဦးတို့အား ကိယာမသ်နေ့တွင် အလ္လာဟ်အရှင်မြတ်သည် စကားပြောတော်မူမည်မဟုတ်၊ ၎င်းတို့အား (အပြစ်များမှ )သန့်စင်စေတော်မူမည်မဟုတ်ပေ၊ ထို့ပြင် သူတို့အဖို့ ပြင်းထန်သောအဇားဗ်ပြစ်ဒဏ်ရှိ၏

عَنْ سَلْمَانَ الْفَارِسِيِّ رَضيَ اللهُ عنه قَالَ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ:
«ثَلَاثَةٌ لَا يُكَلِّمُهُمُ اللَّهُ يَوْمَ الْقِيَامَةِ وَلَا يُزَكِّيهِمْ وَلَهُمْ عَذَابٌ أَلِيمٌ: أُشَيْمِطٌ زَانٍ، وَعَائِلٌ مُسْتَكْبِرٌ، وَرَجُلٌ جَعَلَ اللَّهَ لَهُ بِضَاعَةً، فَلَا يَبِيعُ إِلَّا بِيَمِينِهِ وَلَا يَشْتَرِي إِلَّا بِيَمِينِهِ».
[صحيح] - [رواه الطبراني] - [المعجم الصغير: 821]

ဤဘာသာပြန်ဆိုချက်ကို ပိုမိုသုံးသပ်ရန်နှင့် စစ်ဆေးရန်လိုအပ်သည်။.

စလ်မားန် အလ်ဖာရီစီ (ရဿွိယလ္လာဟုအန်ဟု)က ဆင့်ပြန်ခဲ့သည်။ တမန်တော်မြတ်(ဆွလ္လလ္လာဟုအလိုင်းဟိဝစလ္လမ်) မိန့်ကြားတော်မူသည်။
ပုဂ္ဂိုလ်သုံးဦးတို့အား ကိယာမသ်နေ့တွင် အလ္လာဟ်အရှင်မြတ်သည် စကားပြောတော်မူမည်မဟုတ်၊ ၎င်းတို့အား (အပြစ်များမှ )သန့်စင်စေတော်မူမည်မဟုတ်ပေ၊ ထို့ပြင် သူတို့အဖို့ ပြင်းထန်သောအဇားဗ်ပြစ်ဒဏ်ရှိ၏။ ထိုသူတို့မှာ- ၁။ အိုမင်းသော်လည်း ဇိနာမှုကိုကျူးလွန်သူ ၂။ဆင်းရဲနွမ်းပါးသော်လည်း မောက်မာထောင်လွှားသူ၊ ၃။အလ္လာဟ်အရှင်မြတ်အား မိမိ၏ ကုန်ပစ္စည်းအဖြစ် ပြုလုပ်ထားသူဖြစ်ပြီး၊ (ဆိုလိုသည်မှာ) ၎င်းသည် (မိမိ၏ ကုန်ပစ္စည်းကို) အရှင်မြတ်၏နာမတော်အား ကိုင်တွယ်ကျိန်ဆို၍ ရောင်းချပြီး အရှင်မြတ်၏နာမ‌တော်အား ကိုင်တွယ်ကျိန်ဆို၍ ဝယ်ယူသူ တို့ဖြစ်သည်။
[ဤဟဒီးဆ်သည် ဆွဟီးဟ် အဆင့်ရှိသည်။] - [အသ်သွဗ်ရာနီ ဆင့်ပြန်ခဲ့သည်။] - [المعجم الصغير - 821]

ရှင်းလင်းချက်

တမန်တော်မြတ် (ဆွလ္လလ္လာဟုအလိုင်ဟိဝစလ္လမ်) သည် အလ္လာဟ်အရှင်မြတ်ပေးမည့် အပြစ်ဒဏ်ကို ခံစားထိုက်‌သော လူသုံးမျိုးအကြောင်းကို မိန့်ကြားတော်မူခဲ့သည်။ ထိုသူများသည် အကယ်၍ သောင်ဗဟ်အမှားဝန်ခံခြင်းမပြုပါက သို့မဟုတ် အလ္လာဟ်အရှင်မြတ်၏ ခွင့်လွှတ်တော်မူခြင်းကို မခံရပါက ကိယာမသ်နေ့တွင် အပြစ်ဒဏ်သုံးမျိုးကို ခံစားရမည်ဖြစ်သည်။ ပထမပြစ်ဒဏ် - အလ္လာဟ်အရှင်မြတ်သည် ကိယာမသ်နေ့တွင် ထိုသူတို့အား စကားပြောတော်မူမည် မဟုတ်ပေ။ အကြောင်းမှာ အရှင်မြတ်၏ အမျက်တော်လွန်စွာပြင်းထန်သောကြောင့်ဖြစ်သည်။ ထိုမျှသာမက အရှင်မြတ်သည် သူတို့ထံမှ မျက်နှာလွှဲတော်မူမည်။ သို့တည်းမဟုတ် သူတို့အတွက် မပျော်ရွှင်ဖွယ်စကားများ၊ မိမိ၏အမျက်တော်ကို ဖော်ပြသော စကားများကိုသာ ပြောဆိုတော်မူမည် ဖြစ်သည်။ ဒုတိယပြစ်ဒဏ် - အလ္လာဟ်အရှင်မြတ်သည် ၎င်းတို့အား သန့်စင်စေတော်မူမည် မဟုတ်သလို ချီးမွမ်းတော်မူမည်လည်း မဟုတ်‌ပေ။ ထို့ပြင် အပြစ်များမှ ၎င်းတို့အား သန့်ရှင်းစင် ကြယ်စေတော်မူမည် မဟုတ်ပေ။ တတိယပြစ်ဒဏ် - ၎င်းတို့အတွက် နောင်တမွန်ဘဝတွင် ပြင်းပြနာကျင်ဖွယ်ရာ ပြစ်ဒဏ်များ ရှိခြင်းဖြစ်သည်။ ထိုသို့ ပြစ်ဒဏ်ခံစားရမည့် လူသုံးမျိုးမှာ - ၁။ အသက်အရွယ်အိုမင်းသော်လည်း စက်ဆုပ်ရွံရှာဖွယ်ဇိနာမှုကို ကျူးလွန်သူ။ ၂။ ပစ္စည်းဥစ္စာမရှိသည့် ဆင်းရဲသားဖြစ်သော်လည်း လူတို့အပေါ် မောက်မာထောင်လွှားသူ။ ၃။ ရောင်းဝယ် ဖောက်ကားရာတွင် အလ္လာဟ်အရှင်မြတ်၏(နာမတော်ဖြင့်) မကြာခဏ ကျိန်ဆိုလေ့ရှိသူ။ ထိုသို့အားဖြင့် သူသည် အလ္လာဟ်အရှင်မြတ်၏နာမတော်ကို မထီမဲ့မြင်ပြုကာ ဥစ္စာပစ္စည်း စုဆောင်းရန် လမ်းစအဖြစ် အသုံးချသူဖြစ်သည်။

ဟဒီးဆ်မှ သိမှတ်ဖွယ်ရာများ

1. ကာဿွီအိယာဿ်ွက ဤပြစ်ဒဏ်ပြင်းထန်ရခြင်း၏ အကြောင်းရင်းကို ရှင်းပြရာတွင်ဤသို့ဆိုသည်- သူတို့အနက် လူတစ်ဦးစီသည် အဆိုပါအပြစ်ကို ကျူးလွန်ခဲ့ခြင်းမှာ ယင်းအပြစ်သည် သူတို့နှင့် ဝေးကွာပါလျက်၊ ယင်းအပြစ်ကိုကျူးလွန်ရန် ၎င်းတို့အတွက် အရေးတကြီးလိုအပ်ချက်လည်းမရှိ၊ ထိုအပြစ်သို့ ဆွဲဆောင်သည့်အရာများမှာ ၎င်းတို့ထံ အားနည်းပါလျက် ဖော်ပြထားသည့်အပြစ်ကို ကျူးလွန်ခဲ့ကြသည်။ အပြစ်တစ်စုံတစ်ရာကို ကျူးလွန်သူတိုင်းကို ခွင့်လွှတ်ခြင်းမရှိသော်လည်း၊ ဤအပြစ်များအတွက် မည်သည့်မတတ်သာသည့် အခြေအနေ သို့မဟုတ် ပုံမှန်ဆွဲဆောင်မှုများမရှိသောအခါ ၎င်းတို့၏ ဤအပြစ်ကျူးလွန်ခြင်းသည် အလ္လာဟ်အရှင်မြတ်အား အာခံဖီဆန်ခြင်း၊ အလ္လာဟ်အရှင်မြတ်၏ အခွင့်အရေးကို အလေးမထားခြင်းနှင့် အခြားလိုအပ်ချက်မရှိဘဲ အရှင်မြတ်၏စည်းမျဉ်းကို ရည်ရွယ်ချက်ရှိရှိ ချိုးဖောက်လိုခြင်းနှင့် တူညီနေပေသည်။
2. ဇိနာကျူးလွန်ခြင်း၊ မုသားပြောခြင်းနှင့် မောက်မာထောင်လွှာခြင်းတို့သည် ကြီးမားသောအပြစ်အကုသိုလ်များထဲမှ ဖြစ်သည်။
3. မောက်မာထောင်လွှားခြင်းဆိုသည်မှာ အမှန်တရားကို လက်မခံခြင်း နှင့် လူတို့အားအထင်အမြင် သေးခြင်းတို့ ဖြစ်သည်။
4. အရောင်းအဝယ်ပြုလုပ်ရာတွင် ကျိန်ဆိုခြင်းကို အလွန်အကျွံအသုံးပြုခြင်းမှ သတိပေးထားခြင်း၊ ကျိန်ဆိုခြင်းကို အထူးအလေးထားရန်နှင့် အလ္လာဟ်အရှင်မြတ်၏ နာမတော်များကို ဂုဏ်ပေးလေးစားရန် တိုက်တွန်းထားခြင်း။ အလ္လာဟ်အရှင်မြတ်က မိန့်တော်မူသည်- "ထို့ပြင် အသင်တို့သည် ကောင်းမှု မပြုကြရန်၊ အပြစ် မရှောင်ကြရန်၊ လူများ ကြားတွင် ခိုက်ရန်ဖြစ်မှုကို ဖြန်ဖြေ မပေးကြရန် အသင်တို့၏ ကျိန်ဆိုမှုများ အတွက် အလ္လာဟ် အရှင်မြတ်အား (ဒိုင်းသဖွယ်) အကာအကွယ် မပြုလုပ်ကြနှင့်။ (အလ္လာဟ်နှင့် ကျိန်ဆိုထားသည့် အတွက် ထိုအလုပ်များကို မလုပ်ခြင်း ဖြစ်သည်ဟု အရှင်မြတ်ကို ခုတုံး မလုပ်ကြနှင့်။)" (ဆူရဟ် အလ်-ဘကရဟ် ၂:၂၂၄)