Hadiis: Mam bee M yambã tẽ-sõng pʋga, M bee ne-a a sẽn wat n tẽegd Mam yʋʋrã

عَنْ أَبِي هُرَيْرَةَ رضي الله عنه قَالَ:
قَالَ رَسُولُ اللهِ صَلَّى اللهُ عَلَيْهِ وَسَلَّمَ: «يَقُولُ اللهُ عَزَّ وَجَلَّ: أَنَا عِنْدَ ظَنِّ عَبْدِي، وَأَنَا مَعَهُ حِينَ يَذْكُرُنِي، فَإِنْ ذَكَرَنِي فِي نَفْسِهِ ذَكَرْتُهُ فِي نَفْسِي، وَإِنْ ذَكَرَنِي فِي مَلَإٍ ذَكَرْتُهُ فِي مَلَإٍ خَيْرٍ مِنْهُ، وَإِنِ اقْتَرَبَ إِلَيَّ شِبْرًا، تَقَرَّبْتُ إِلَيْهِ ذِرَاعًا، وَإِنِ اقْتَرَبَ إِلَيَّ ذِرَاعًا، اقْتَرَبْتُ إِلَيْهِ بَاعًا، وَإِنْ أَتَانِي يَمْشِي أَتَيْتُهُ هَرْوَلَةً».
[صحيح] - [متفق عليه] - [صحيح مسلم: 2675]

Yii a Abɩɩ Hʋrayrat nengẽ, (Wẽnd yard be a yĩnga), a yeelame:
Wẽnd Tẽn-tʋʋmã yeelame, (Wẽnd pʋʋsg la A tɩlgr be a yĩngɑ): «Wẽnd yetame (A Naam zẽk yã): Mam bee M yambã tẽ-sõng pʋga, M bee ne-a a sẽn wat n tẽegd Mam yʋʋrã, rẽnd a sã n tẽeg Maam a mengẽ wã, M tẽegd-a-la M Mengẽ wã, a sã n tẽeg Maam zama pʋgẽ, Mam tẽegd-a-la zama pʋgẽ sõmblem sẽn yɩɩd zamã-kãngã, a sã n bao pẽnegr ne Maam nug-yakemde, Mam pẽnegd-a-la ne kãntɩɩga, la a sã n bao pẽnegr ne Maam ne kãntɩɩga, Mam baooda pẽnegr ne-a ne nug-loore, la a sã n wa Mam nengẽ t'a yaa sẽn kẽnde, M wata a nengẽ tɩ M yaa sẽn zãoosde».
[Naṣʋn Ṣahɩɩhʋn (Gom-sikdem sẽn manege)] - [B zemsa taab a zugu (A Al-Bʋẖaariy la a Muslim n reeg-a)] - [Ṣahɩɩh Muslim - 2675]

bilgrã

Nabiyaamã kõo kibare (Wẽnd pʋʋsg la A tɩlgr be a yĩngɑ) tɩ Wẽnde (A Naam zẽk yã) a yetame:
Mam bee M yambã tẽ-sõngẽ ne Maam, rẽnd M tʋmda ne M yambã n zems ne yẽ sẽn tar tẽ-sõng ning ne Maamã, la rẽnda yaa sẽn tũ ne yẽnda sẽn tar tẽeb ne yel-sõmde la zũnuubã yaafa, M leb n maanda bũmb ning a sẽn tẽed Mam nengẽ sẽn yaa sõma la zẽng sẽn ka rẽ, Mam bee ne-a yolsgã la segl sõngã la kãndgrã la gũubã la sõngrã a sã n tẽeg Mam yelle.
Rẽnd a sã n tẽeg Mam yelle a nengẽ wã t'a yaa sẽn welg a toor n bak ne Sʋbhaanallaah la Laa'ɩlaaha ɭllallaah maaneg la zẽng sẽn ka yɩ rẽnda, Mam tẽegd-a-la Mam nengẽ.
La a sã n tẽeg Mam yell zama sʋka, Mam tẽegda a yell zama waooglem la a sõmblem sẽn yɩɩd zama-kãnga.
La ned ning sẽn pẽnega Wẽnd sẽn zems nug-yakemde, Wẽnd paasd-a lame t'a paam pẽnegr ne Wẽnd ne kãntɩɩga.
La ned ning sẽn bao pẽnegr ne Wẽnd t'a woglem ta kanga, Wẽnd pẽnegd-a lame t'a ta nug-yakemde.
La a sã n wa Wẽnd nengẽ t'a yaa sẽn kẽnde, Wẽnd wata a nengẽ ne yãgengo.
Rẽnd yamb sã n bao pẽnegr ne a Soabã ne tũudmã la toaglã, a Soabã paasd-a-la pẽnegre, tɩ yaa sẽn na n rol-a ne tʋʋmdã buudu.
Rẽnd muumin tũudmã sẽn pid fãa ne a Soabã, a pẽnegda Wẽnde (A Naam zẽk yã) Wẽnd kũunã la a yel-sõmã rolbo, a yɩɩda yambã tʋʋmã la a nongã, la raabã yaa tɩ Wẽnd keoorã a wila yambã tʋʋma, zem tɩ yaa a sõmblemã la a waooglemã.
Rẽnd muumin a manegda a tẽebo la a tʋmdẽ la a yãgdẽ la a paasd a tʋʋmã halɩ t'a wa tʋg n yek Wẽnde.

Sẽn be Hɑdiisã yõod-rãmbẽ

1. Hadiis-kãngã bee hadiis-rãmb nins Nabiyaamã (Wẽnd pʋʋsg la A tɩlgr be a yĩnga) sẽn togsde, tɩ yaa sẽn yi a Soabã nengẽ, b boond-a lame tɩ hadiis Ƙudsy (hadiis yɩlenga) maa hadiis ɭlaahy (Wẽnd hadiisi) yẽ me la hadiis ninga, a gom-biisã la a maanã wã yii Wẽnd nengẽ, la mikame t'a ka tar Alkʋrãanã sẽn tar yεl ninsã ye, b sẽn tũud Wẽnd ne a karengã, la yɩlgd a yĩnga la a leb n geesdẽ la a komsd nebã tɩ b ka tõe n wa ne a buudu la zẽng sẽn ka rẽndã, hadiis ƙudsy wã ka tar rẽ ye.
2. A Al-Gʋrri (Wẽnd na yols-a) a yeelame: sɩdã rãmbã b sɩfda Wẽnde, ne bũmb ninga A sẽn sɩf A Mengã (A Naam zẽk yã), la ne bũmb ninga Wẽnd Tẽn-tʋʋm sẽn sɩf ne-A wã (Wẽnd pʋʋsg la A tɩlgr be a yĩngɑ) la Ṣahaabsã sẽn sɩf ne-A bũmb ninga (Wẽnd yard be b yĩnga) la wãnde la bãngdbã na-kẽndre, sẽn yaa neb nins sẽn pʋg vũunã n ka maan Bid'ah n sɩng yεlã. gomdã sεεme. Rẽnd Sunnah rãmba tabenda ne Wẽnde bũmb ninga A sẽn tabend A Menga, yʋy la sɩf-rãmba, tɩ ka tũ ne wẽnebo, ka tũ ne basbo, ka tũ ne bao n bãng b yalε wã, ka rɩkda n wõnesd ne bõn-naandse, la b tusd n zãagdẽ, Wẽnd sẽn tus n zãag A Mengã, la b sĩndid n basd yεl nins b sẽn ka gɩdg la b ka saglã, Wẽnd yeelame (A Naam zẽk yã): (Bũmb pa be n wõnd-A ye, la Yẽnda la a Wʋmd n yaa Neta).
3. Maneg tẽebã ne Wẽndã, yaa tɩlae tɩ tʋʋm lageme, a Al-hasan Al-basriy yeelame (Wẽnd na yols-a): ad muumin sã n maneg a tẽebã ne a Soabã la a maneg a tʋʋmdã, A manegda a tʋʋmdã. La ad nin-wẽnga, a wẽnga a tẽebã ne Wẽnde, rẽ n kɩt t'a maand tʋʋm wẽnse.
4. Limaam Al-ƙurtubiy yeelame (Wẽnd na yols-a): b yeelame: "Mam yambã tẽ-sõngã ne Maamã" a võore, yaa a sẽn tẽed tɩ b reeg a doaagã kosgã sasa, la a sẽn tẽed tɩ b na n reega a tuubgu tuubgã sasa, la zũnuubã yaafg yaafgã sasa, la yel-sõmd rolbo tũudmã sẽn wat n maan ne b sart-rãmba, yaa a sẽn gãd Wẽnd pʋlengã sɩda, rẽ n kɩt tɩ sõmba ne ned t'a nidg pãnga ne yẽ sẽn be bũmb ning zugã, n maan bãng-n-wãaka tɩ Wẽnd na n reegame, A na n yaafame, bala Wẽnd pʋlma rẽnda, Wẽnd pʋlengã ka yidgdi, a sã n loe maa a tẽedame t'a tũudmã ka na n reege, a tũudmã ka nefd ye, yaa woto la wãag f tẽeb ne Wẽnd yolsgã, yẽ me bee zũnuub bεdã pʋse, ned ning sẽn wa n ki ne yel-kãngã b kelled n bas-a-la ne bũmb ninga a sẽn da tẽedã, la sẽn be hadiisã soyã sãnda pʋgẽ: "bɩ mam yambã tẽ Maam tẽeb ninga a sẽn tʋlle", a yeelame: sã n yaa yaafgã tẽ-sõngã n lagem ne ket n be zũnuubã pʋgẽ wã, ad rẽnda yaa zɩɩlem la belg-m-meng tεkẽ.
5. Hadiisã kengdame tɩ b nidg pãng ne Wẽnd yʋʋrã tẽegre, f mengẽ wã la f zelemdã fãa, f mengẽ wã la f sũurẽ wã, n yεεsd Wẽnde, la f tẽegd A zɩslemã la A hakε wã, la f tall tẽeb ne-A la f zɩsgd-A la f nong-A, la f maan tẽ-sõng ne Wẽnde, la f yɩlg f tʋʋmdã Wẽnd yĩnga, la f yeel ne f zelemdã: Sʋbhɑɑnɑ Allɑɑh, wa Al-hamdu lillaah, wa laa ɩlaaha ɩlla Allaah, wa Allaahʋ Akbar, wa laahawla walaa ƙuwwata illaa billaah.
6. A ɭbn Abɩɩ Gamra yeelame (Wẽnd na yols-a): ned ning sẽn tẽega Wẽnd t'a yaa yεεsda, A kõt-a-la bas-m-yam, a sã n yaa nen-soabg soaba, A kõt-a-la nen-yubsgu.
7. Nug-yakemdã: yaa bũmb ning sẽn be nug-bi-kεmlgẽ wã ne nug-raoogã sʋka tɩ f sã n yaag f nugã, la kangã: yaa bũmb ning sẽn be nu-bi tẽng-n-sʋgr zugu n tʋg n tãag kãntɩɩgã kõbre, la kãntɩɩga yaa Adam biig kams a yiibã yalem la a kam-lulsã la a yãoogã yalem; la yẽnda yaa kams a naase.