حدیث: په رضاعت سره هغه ډول حرمت رامنځته کېږي لکه څنګه چې په زېږون (نسب) سره رامنځته کېږي

عَنْ عَائِشَةَ رَضِيَ اللَّهُ عَنْهَا عَنِ النَّبِيِّ صَلَّى اللهُ عَلَيْهِ وَسَلَّمَ قَالَ:
«الرَّضَاعَةُ تُحَرِّمُ مَا تُحَرِّمُ الوِلَادَةُ».
[صحيح] - [متفق عليه] - [الأربعون النووية: 44]

له عایشې رضی الله عنها نه روایت دی چې رسول الله صلی الله علیه وسلم فرمایلي:
«په رضاعت سره هغه ډول حرمت رامنځته کېږي لکه څنګه چې په زېږون (نسب) سره رامنځته کېږي».
[صحيح دی] - [متفق علیه دی] - [الأربعين النوويه - 44]

تشریح

نبي صلی الله علیه وسلم څرګنده کړې ده چې د رضاعت له امله هغه څه حرامېږي چې د زیږون او نسب له امله حرام وي، لکه د ماما، تره ، ورور او نور محرمې اړیکې... او همدارنګه هغه څه د رضاعت له امله روا کېږي چې د زیږون له امله روا دي.

د حديث له ګټو څخه

1. دا حدیث د رضاعت په احکامو کې بنسټیزه قاعده ده.
2. ابن حجر ویلي: «الرَّضاعَةُ تُحرِّمُ ما تُحرِّمُ الولادة» معنی دا ده: رضاعت هغه څه روا کوي چې زېږون یې روا کوي، دا خبره د اجماع له مخې د نکاح د تحریم او اړونده احکامو په اړه صحیح ده، او دا چې په رضاعت سره د شيده خوړونکي او شیده ورکوونکي د ماشومانو ترمنځ حرمت رامنځته کېږي او یو د بل خپلوان ګرځي چې له امله یې د دوی تر منځ یو بل لېدل، د یو بل سره په خلوت کې ناسته پاسته، او یو بل سره سفر کول روا کېږي، خو نور احکام پرې نه مرتبېږي لکه: د مورولۍ له امله له یوبل څخه میراث وړل، د نفقې وجوب، په ملکیت سره ازادېدل، ګواهي، دیت او د قصاص ساقطېدل.
3. په رضاعت سره رامنځته شوی حرمت ابدي او د تل لپاره دی.
4. نور حدیثونه پدې دلالت کوي چې په رضاعت سره هغه مهال حرمت رامنځته کېږي چې پنځه ځلې په پوره ډول تی رودل شوی وي، او دا چې په لومړیو دوو کلونو کې وي.
5. د نسب له مخې حرامې شوې ښځې (محرمات) عبارت دي له: مورګانو څخه چې نياګانې هم پکې راځي، یعنې د مور یا پلار له طرفه او څومره چې پورته ځي، او لورګانې: چې په دوی کې د لورګانو لورګانې او لمسیان راځي او څومره چې پسې ښکته ځې. او خورګانې: برابره ده که سکنۍ خور وي او یا ناسکه. او ترورګانې (د پلار خور) چې پدې کې د پلار ټولې خورګانې راځي، برابره ده که سکه وي او یا ناسکه او همدا رنګه ستا د نیکونو ټولې خورګانې اګر که څومره پسې پورته هم وي. او خاله ګانې (د مور خور) چې پدې کې د مور ټولې خورګانې راځي؛ برابره ده که سکه وي او یا ناسکه او د نیاګانو ټولې خورګانې اګر که څومره پسې پورته لاړې شي؛ برابره ده که د پلار لخوا نیاګانې وي او یا د مور له طرفه. او ورېرې (د ورور لور) او خورزې (د خور لور) چې پدې کې د دوی لورګانې هم راځي اګر که څومره پسې ښکته لاړې شي.
6. په رضاعت سره حرامې شوې ښځې، نو په رضاعت سره هم د نسب په څېر حرمت رامنځته کېږي، یعنې هره ښځه چې د وینې او نسب له امله حرامه وي، د رضاع له امله هم ورته حرامه ګڼل کېږي، خو د رضاعت له مخې د رضاعي ورور مور او د رضاعي زوی خور حرامې نه دي.