Hadiis: Ramadaanã sã n wa, b pakda arzãnã ragnoyã, la b pag Bugmã ragnoyã, la b sẽb sʋɩɩtãambã

عَنْ أَبِي هُرَيْرَةَ رَضِيَ اللهُ عَنْهُ أَنَّ رَسُولَ اللهِ صَلَّى اللهُ عَلَيْهِ وَسَلَّمَ، قَالَ:
«إِذَا جَاءَ رَمَضَانُ فُتِّحَتْ أَبْوَابُ الْجَنَّةِ، وَغُلِّقَتْ أَبْوَابُ النَّارِ، وَصُفِّدَتِ الشَّيَاطِينُ».
[صحيح] - [متفق عليه] - [صحيح مسلم: 1079]

Yii Abɩɩ Hʋrɑyrɑt nengẽ (Wẽnd yɑrd be ɑ yĩngɑ) tɩ Wẽnd Tẽn-tʋʋmɑ (Wẽnd pʋʋsg la A tɩlgr be a yĩnga) ɑ yeelame:
«Ramadaanã sã n wa, b pakda arzãnã ragnoyã, la b pag Bugmã ragnoyã, la b sẽb sʋɩɩtãambã».
[Naṣʋn Ṣahɩɩhʋn (Gom-sikdem sẽn manege)] - [B zemsa taab a zugu (A Al-Bʋẖaariy la a Muslim n reeg-a)] - [Ṣahɩɩh Muslim - 1079]

bilgrã

Nabiyaamã (Wẽnd pʋʋsg lɑ A tɩlgr be ɑ yĩngɑ) kõo kibare, tɩ Ramadaanã kiuug sã n kẽ, yεl a tãab n yɩte: Rẽenem: b pakda arzãnã ragnoyã, t'a noor baa a yembr ka na n pag ye. Yiib soaba: b pagda Bugmã ragnoyã tɩ noor baa a yembr ka na n pak ye. Tãab soaba: b sẽbda sʋɩɩtãambã la zĩn-tõtsã ne bãeese, rẽnd b ka tõe n ta zĩis nins b sẽn da tatã sẽn pa Ramadãanã wakatã. La wãnde fãa yaa kiuugã zɩsgre, b leb n yaa yamleoog kũun ne tʋmdbã tɩ b wɩsg b pãng ne tũudum-rãmb sẽn yaa Pʋʋsg la sãra-rãmba la Wẽnd yʋʋrã tẽegr la Alkʋrãanã karengo la sẽn wõnd rẽ; la b zãag zũnuub-rãmb la Wẽnd kɩɩsgo.

Sẽn be Hɑdiisã yõod-rãmbẽ

1. Ramadãan kiuugã yɩɩdlem.
2. A yaa sũ-noogr ne no-loεtbã a pʋgẽ, tɩ b bãng tɩ ki-kãngã sẽn yaa albark kiuugã, yaa tũudum la yel-sõma wakato.
3. Sʋɩtãambã sẽbrã Ramadãanã pʋgẽ wã, wilgdame tɩ baalik ka tar padang ye, yaa wala b yet-a lame: b gɩdga sʋɩɩtãambã n yi foom, bɩ f ra leb n bao padang ne bãmba, tɩ f sã n bas tũudum maa f maana Wẽnd kɩɩsg ye.
4. Al-ƙʋrtubiy (Wẽnd na yols-a) a yeelame: la b sã n yeele: yaa bõe tɩ b ne yel-wẽnsã la Wẽnd kɩɩsgã sẽn ket n yɩt Ramadãanã pʋgẽ wʋsgo, rẽnd b sã n rag n sẽba sʋɩɩtãambã rẽ kõn n yɩ ye? Rẽnd a leokre: Yaa tɩ b lebgda kɩdg no-loεtbã nengẽ, no-loeer ning a soabã sẽn gũus a sart-rãmbã la a zʋgdã, sã n ka rẽ, tõeeme tɩ b sẽn loe wã, yaa sʋɩɩtãambã kẽere, bãmb me la sʋɩɩtãamb kεdgdbã, n yaa raeegdbã, la ka b fãa gill ye, wala sẽn wa hadiisã togsg sãndã pʋgẽ wã. La b sẽn ratã yaa tɩ yel-wẽnsã yaa bilf a pʋgẽ, yẽ me yaa bũmb ned fãa sẽn yãt Ramadãanã kiuug pʋgẽ, rẽnd yel-kãensã yɩɩb Ramadãanã pʋgẽ wã a paoodame n yɩɩd kiuus a taabã, bala ka tɩlae tɩ b sẽn sẽbg b gillã, bɩ wẽng maa Wẽn-kɩɩsg ra yɩ ye, ad yel-kãng tara sabab-rãmb sẽn ka sʋɩɩtãamb ye, wala yõy nins sẽn yaa yoodã la nebã yel-minimidsã la nisaal sʋɩɩtãambã.