ហាទីស្ហ: “ពិតប្រាកដណាស់ អល់ឡោះពិតជាបានឲ្យនាងចូលឋានសួគ៌តាមរយៈផ្លែល្មើនេះ ឬពិតជាបានដោះលែងនាងពីឋាននរកតាមរយៈផ្លែល្មើនេះ”។

عَنْ عَائِشَةَ أُمِّ المؤْمِنين رَضيَ اللهُ عنها قَالَتْ:
جَاءَتْنِي مِسْكِينَةٌ تَحْمِلُ ابْنَتَيْنِ لَهَا، فَأَطْعَمْتُهَا ثَلَاثَ تَمَرَاتٍ، فَأَعْطَتْ كُلَّ وَاحِدَةٍ مِنْهُمَا تَمْرَةً، وَرَفَعَتْ إِلَى فِيهَا تَمْرَةً لِتَأْكُلَهَا، فَاسْتَطْعَمَتْهَا ابْنَتَاهَا، فَشَقَّتِ التَّمْرَةَ الَّتِي كَانَتْ تُرِيدُ أَنْ تَأْكُلَهَا بَيْنَهُمَا، فَأَعْجَبَنِي شَأْنُهَا، فَذَكَرْتُ الَّذِي صَنَعَتْ لِرَسُولِ اللهِ صَلَّى اللهُ عَلَيْهِ وَسَلَّمَ، فَقَالَ: «إِنَّ اللهَ قَدْ أَوْجَبَ لَهَا بِهَا الْجَنَّةَ، أَوْ أَعْتَقَهَا بِهَا مِنَ النَّارِ».
[صحيح] - [رواه مسلم] - [صحيح مسلم: 2630]

អំពី អាអ៊ីស្ហះ អ៊ុមមុលមុមីនីន رضي الله عنها បាននិយាយថា៖
មានស្ដ្រីក្រីក្រម្នាក់បានមកជួបខ្ញុំដោយពរកូនស្រីពីរនាក់មកជាមួយ។ ខ្ញុំក៏បានផ្ដល់ឲ្យនាងនូវផ្លែល្មើបីផ្លែ។ ពេលនោះ ស្ត្រីនោះបានឲ្យកូននាងម្នាក់មួយផ្លែ។ ចំណែកមួយផ្លែទៀត នាងបានយកដាក់មាត់បំរុងនឹងបរិភោគ ស្រាប់តែកូនទាំងពីររបស់នាងបានសុំវាពីនាងទៀត។ ពេលនោះ នាងក៏កាត់ផ្លែឈើដែលនាងបំរុងនឹងបរិភោគនោះជាពីរចំណែក រួចឲ្យកូននាងម្នាក់មួយចំណែក។ ខ្ញុំមានការរំភើបនឹងទង្វើរបស់នាង ហើយខ្ញុំក៏បានរៀបរាប់នូវអ្វីដែលនាងបានធ្វើជម្រាបប្រាប់រ៉ស៊ូលុលឡោះ ﷺ។ ពេលនោះ លោកបានមានប្រសាសន៍ថា៖ “ពិតប្រាកដណាស់ អល់ឡោះពិតជាបានឲ្យនាងចូលឋានសួគ៌តាមរយៈផ្លែល្មើនេះ ឬពិតជាបានដោះលែងនាងពីឋាននរកតាមរយៈផ្លែល្មើនេះ”។
[صحيح] - [رواه مسلم] - [صحيح مسلم - 2630]

ពន្យល់

អ៊ុមមុលមុមីនីន អាអ៊ីស្ហះ رضي الله عنها បានរំលឹកថា ជាការពិតណាស់ មានស្ដ្រីក្រីក្រម្នាក់បានមកសុំទានគាត់ ព្រមទាំងមានពរកូនស្រីពីរនាក់មកជាមួយផង។ ពេលនោះ គាត់ក៏បានឲ្យស្ត្រីនោះនូវផ្លែល្មើបីផ្លែ។ ស្ត្រីនោះក៏បានឲ្យផ្លែល្មើនោះទៅកូនរបស់ខ្លួនម្នាក់មួយផ្លែ។ ចំណែកមួយផ្លែទៀត ស្ត្រីនោះបានយកដាក់មាត់បំរុងនឹងបរិភោគទៅហើយ តែភ្លាមនោះ កូនស្រីទាំងពីររបស់នាងបានសុំផ្លែល្មើនោះពីនាងទៀត។ នាងក៏យកផ្លែទីបីនេះកាត់ជាពីរចំណែក។ ទង្វើនេះ ធ្វើឲ្យអាអ៊ីស្ហះមានការរំភើបចិត្តជាខ្លាំង ហើយគាត់ក៏បានរៀបរាប់នូវអ្វីដែលស្ត្រីនោះបានធ្វើជម្រាបប្រាប់ណាពី ﷺ។ ពេលនោះ លោកបានមានប្រសាសន៍ថា៖ ពិតប្រាកដណាស់ អល់ឡោះពិតជាបានឲ្យនាងចូលឋានសួគ៌តាមរយៈផ្លែល្មើនេះ ឬពិតជាបានដោះលែងនាងពីឋាននរកតាមរយៈផ្លែល្មើនេះ។

មេរៀនដែលទាញបានពីហាទីស្ហ

1. ឧត្តមភាពនៃការបរិច្ចាគទាន បើទោះបីជាវាតិចតួចក៏ដោយ ហើយវាចង្អុលបង្ហាញពីភាពស្មោះត្រង់របស់អ្នកមានជំនឿចំពោះសេចក្តីជំនឿរបស់គេចំពោះម្ចាស់របស់គេ និងការជឿជាក់របស់គេចំពោះការសន្យា និងក្តីសប្បុរសរបស់ទ្រង់។
2. ក្តីមេត្តាករុណាដ៏ធំធេងរបស់មាតាទាំងឡាយចំពោះកូនៗរបស់ខ្លួន ហើយបារម្ភខ្លាចកូនៗរបស់ខ្លួនអត់ឃ្លាន។
3. ឧត្តមភាពនៃការគិតគូពីអ្នកដទៃជាងខ្លួនឯង ក្តីមេត្តាករុណាចំពោះក្មេងៗ ការបន្ថែមនូវក្តីស្រឡាញ់និងភាពទន់ភ្លន់ចំពោះកូនស្រី ហើយប្រការទាំងអស់នោះ គឺស្ថិតក្នុងចំណោមមូលហេតុនាំឲ្យចូលឋានសួគ៌ និងត្រូវបានដោះលែងពីឋាននរក។
4. បរិមាណតិចតួចពុំបានរារាំងដល់ការបរិច្ចាគទានត្បិតតែវាតិចតួចស្តួចស្តើងនោះឡើយ។ ផ្ទុយទៅវិញ គប្បីលើអ្នកបរិច្ចាគត្រូវបរិច្ចាគនូវអ្វីដែលខ្លួនមាន ទោះតិចឬច្រើន។
5. ក្នុងហាទីស្ហនេះបញ្ជាក់ពីស្ថានភាពនៅក្នុងផ្ទះរបស់ណាពី ﷺ ក៏ដូចជាស្ថានភាពនៃការរស់នៅរបស់លោក និងក្រុមគ្រួសាររបស់លោក។ ជាការពិតណាស់នៅក្នុងផ្ទះរបស់ពួកគាត់ គឺគ្មានអ្វីសម្រាប់បរិភោគឡើយ ក្រៅពីផ្លែល្មើពីរបីផ្លែប៉ុណ្ណោះ។