حدیث: شب قدر کو رمضان کے آخری عشرے کی طاق راتوں میں تلاش کرو۔

عَنْ عَائِشَةَ رَضِيَ اللَّهُ عَنْهَا أَنَّ رَسُولَ اللَّهِ صَلَّى اللهُ عَلَيْهِ وَسَلَّمَ قَالَ:
«تَحَرَّوْا لَيْلَةَ القَدْرِ فِي الوِتْرِ مِنَ العَشْرِ الأَوَاخِرِ مِنْ رَمَضَانَ».
[صحيح] - [متفق عليه] - [صحيح البخاري: 2017]

عائشہ رضی اللہ عنہا سے مروی ہے کہ اللہ کے رسول ﷺ نے فرمایا:
"شب قدر کو رمضان کے آخری عشرے کی طاق راتوں میں تلاش کرو۔"
[صحیح] - [متفق علیہ] - [صحيح البخاري - 2017]

شرح

اللہ کے نبی صلی اللہ علیہ و سلم نے زیادہ سے زیادہ نیکی کے کاموں کے ذریعہ لیلۃ القدر تلاش کرنے کی ترغیب دی ہے۔ لیلۃ القدر رمضان کے آخری عشرے کی طاق راتوں یعنی اکیسویں، تئیسویں، پچیسویں، ستائیسويں اور انتیسویں راتوں میں کسی ایک رات میں ہوا کرتی ہے۔

حدیث کے کچھ فوائد

1. شب قدر کی فضیلت اور اسے تلاش کرنے کی ترغیب۔
2. اللہ کی حکمت اور رحمت کا تقاضا یہ ہوا کہ اس رات کو پوشیدہ رکھا جائے، تاکہ اس کی طلب میں لوگ خوب عبادت کیا کریں اور انھیں بڑا اجر وثواب مل سکے۔
3. شب قدر رمضان کی آخری دس راتوں میں سے کوئی ایک رات ہوا کرتی ہے۔ اس بات کی امید زیادہ ہے کہ آخری عشرے کی کوئی طاق رات ہو۔
4. شب قدر رمضان کی آخری دس راتوں میں سے ایک رات ہے۔ اسی رات میں اللہ نے اپنے نبی صلی اللہ علیہ و سلم پر قرآن اتارا اور اسے برکت، قدر ومنزلت اور اس میں کیے گئے عمل صالح کے اثرات کے اعتبار سے ایک ہزار راتوں سے بہتر قرار دیا۔
5. اس رات کو لیلۃ القدر یا تو اس کے فضل وشرف کی بنا پر کہا گیا ہے۔ عربی میں کہا جاتا ہے: "فلان عظيم القدر" یعنی فلاں بڑی قدر ومنزلت والا انسان ہے۔ لیلۃ القدر کی اضافت کسی چیز کی اضافت اس کی صفت کی جانب کرنے کے قبیل سے ہے۔ یعنی یہ بڑی قدر ومنزلت والی رات ہے۔ ارشاد ربانی ہے : "إِنَّا أَنْزَلْنَاهُ فِي لَيْلَةٍ مُبَارَكَةٍ"۔ [سورہ دخان : 3] یعنی ہم نے اسے ایک مبارک رات میں اتارا۔ یا پھر قدر لفظ تقدیر سے ہے۔ اس صورت میں لیلۃ القدر کی اضافت ظرف کی اضافت اس کے مشتملات کی جانب کرنے کے قبیل سے ہے۔ یعنی یہ ایک ایسی رات ہے، جس میں سال بھر میں رونما ہونے والے تمام امور کا فیصلہ کر دیا جاتا ہے۔ ارشاد باری تعالی ہے : "فِيهَا يُفْرَقُ كُلُّ أَمْرٍ حَكِيمٍ" [سورہ دخان : 4] یعنی اس رات میں ہر مضبوط کام کا فیصلہ کر دیا جاتا ہے۔