Hadith: “ចូរពួកអ្នកកុំដាក់បណ្តាសាគាត់អី។ សូមស្បថនឹងអល់ឡោះ! ខ្ញុំដឹងថា គាត់ពិតជាស្រឡាញ់អល់ឡោះ និងអ្នកនាំសាររបស់ទ្រង់មែន”។

عَنْ عُمَرَ بْنِ الخَطَّابِ رَضِيَ اللَّهُ عَنْهُ:
أَنَّ رَجُلًا عَلَى عَهْدِ النَّبِيِّ صَلَّى اللهُ عَلَيْهِ وَسَلَّمَ كَانَ اسْمُهُ عَبْدَ اللَّهِ، وَكَانَ يُلَقَّبُ حِمَارًا، وَكَانَ يُضْحِكُ رَسُولَ اللَّهِ صَلَّى اللهُ عَلَيْهِ وَسَلَّمَ، وَكَانَ النَّبِيُّ صَلَّى اللهُ عَلَيْهِ وَسَلَّمَ قَدْ جَلَدَهُ فِي الشَّرَابِ، فَأُتِيَ بِهِ يَوْمًا فَأَمَرَ بِهِ فَجُلِدَ، فَقَالَ رَجُلٌ مِنَ القَوْمِ: اللَّهُمَّ الْعَنْهُ، مَا أَكْثَرَ مَا يُؤْتَى بِهِ؟ فَقَالَ النَّبِيُّ صَلَّى اللهُ عَلَيْهِ وَسَلَّمَ: «لاَ تَلْعَنُوهُ، فَوَاللَّهِ مَا عَلِمْتُ أَنَّهُ يُحِبُّ اللَّهَ وَرَسُولَهُ».
[صحيح] - [رواه البخاري] - [صحيح البخاري: 6780]

អំពី អ៊ូមើរ ពិន អាល់ខត្តប رضي الله عنه
ពិតណាស់ នៅសម័យកាលណាពី ﷺ មានបុរសម្នាក់ឈ្មោះថា អាប់ទុលឡោះ ហើយគេដាក់ងារគាត់ថា ហ៊ីម៉ារ។ គាត់តែងធ្វើឱ្យរ៉ស៊ូលុលឡោះ ﷺ សើចសប្បាយ។ ប៉ុន្តែណាពី ﷺ ក៏ធ្លាប់បានវាយដាក់ទោសគាត់នឹងរំពាត់ដោយសារការផឹកស្រាដែរ។ ថ្ងៃមួយ បុរសនោះត្រូវបានគេនាំមកម្ដងទៀត។ ដូច្នេះ ណាពីក៏បានបញ្ជាឱ្យវាយដាក់ទោសបុរសនោះនឹងរំពាត់។ ខណៈនោះ មានបុរសម្នាក់នៅក្នុងក្រុមបាននិយាយថា៖ ឱអល់ឡោះជាម្ចាស់! សូមទ្រង់ដាក់បណ្តាសាជននេះចុះ! ហេតុអ្វីបានជាគេនាំបុរសនេះមកញឹកញាប់យ៉ាងនេះ? ពេលនោះ ណាពី ﷺ លោកបានមានប្រសាសន៍ថា៖ “ចូរពួកអ្នកកុំដាក់បណ្តាសាគាត់អី។ សូមស្បថនឹងអល់ឡោះ! ខ្ញុំដឹងថា គាត់ពិតជាស្រឡាញ់អល់ឡោះ និងអ្នកនាំសាររបស់ទ្រង់មែន”។
[صحيح] - [رواه البخاري] - [صحيح البخاري - 6780]

Explanation

នៅសម័យកាលណាពី ﷺ មានបុរសម្នាក់ឈ្មោះថា អាប់ទុលឡោះ ហើយគេដាក់ងារគាត់ថា ហ៊ីម៉ារ។ ពាក្យសម្តីមួយចំនួនដែលគាត់និយាយចេញមកតែងធ្វើឱ្យណាពី ﷺ សើចសប្បាយ។ ប៉ុន្តែណាពី ﷺ ក៏ធ្លាប់បានវាយដាក់ទោសគាត់នឹងរំពាត់ដោយសារការផឹកស្រាដែរ។ ថ្ងៃមួយ បុរសនោះត្រូវបានគេនាំមកម្ដងទៀតដោយសារតែការផឹកស្រាដដែល។ ដូច្នេះ ណាពីក៏បានបញ្ជាឱ្យគេវាយដាក់ទោសបុរសនោះនឹងរំពាត់។ ខណៈនោះ មានបុរសម្នាក់ក្នុងចំណោមអ្នកដែលមានវត្តមាននៅទីនោះបានជេរប្រមាថបុរសនោះ ហើយនិយាយថា៖ ឱអល់ឡោះជាម្ចាស់! សូមទ្រង់ដាក់បណ្តាសាជននេះចុះ! ហេតុអ្វីបានជាគេនាំបុរសនេះមកញឹកញាប់ព្រោះតែការផឹកស្រាយ៉ាងនេះ? ពេលនោះ ណាពី ﷺ លោកបានមានប្រសាសន៍ថា៖ ចូរពួកអ្នកកុំដាក់បណ្តាសាគាត់ដោយសុំឲ្យបណ្តេញគាត់ឲ្យឃ្លាតឆ្ងាយពីក្តីមេត្តាករុណារបស់អល់ឡោះអី។ សូមស្បថនឹងអល់ឡោះ! ខ្ញុំពិតជាដឹងថា គាត់ពិតជាស្រឡាញ់អល់ឡោះ និងអ្នកនាំសាររបស់ទ្រង់មែន។

Benefits from the Hadith

1. មិនផ្ទុយគ្នានោះទេរវាងការដែលបុគ្គលម្នាក់ប្រព្រឹត្តអំពើដែលច្បាប់ឥស្លាមហាមឃាត់ និងការមានក្តីស្រឡាញ់ចំពោះអល់ឡោះនិងអ្នកនាំសាររបស់ទ្រង់នៅក្នុងដួងចិត្តជនដែលប្រព្រឹត្តនោះ ពីព្រោះណាពី ﷺ លោកបានប្រាប់ថា ជាការពិតណាស់ បុរសដែលបានលើកឡើងខាងលើ គឺគាត់មានក្តីស្រឡាញ់ចំពោះអល់ឡោះនិងអ្នកនាំសាររបស់ទ្រង់ ទោះជាគាត់បានប្រព្រឹត្តប្រការដែលគេហាមឃាត់(ផឹកស្រា)ក៏ដោយ។
2. អ្នកដែលប្រព្រឹត្តបាបកម្មធំ ប្រសិនបើរូបគេស្លាប់ទៅទាំងដែលរូបគេនៅបន្តប្រព្រឹត្តអំពើនោះទៀត គឺរូបគេស្ថិតក្រោមចេតនារបស់អល់ឡោះ។ ប្រសិនបើអល់ឡោះមានចេតនា ទ្រង់អភ័យទោសដល់រូបគេ ហើយប្រសិនបើទ្រង់មានចេតនា ទ្រង់នឹងដាក់ទណ្ឌកម្មចំពោះរូបគេ។ គ្មានអ្នកឥស្លាមណាម្នាក់ដែលស្ថិតនៅជាអមតៈក្នុងឋាននរកឡើយ។
3. មិនគប្បីដាក់បណ្តាសាអ្នកផឹកស្រាណាម្នាក់ចំៗនោះឡើយ ព្រោះអាចមានឧបសគ្គដែលរារាំងអំពីប្រសិទ្ធភាពនៃការដាក់បណ្តាសា។ និងដោយសារតែការដាក់បណ្តាសាចំៗអាចធ្វើឲ្យបុគ្គលនោះកាន់តែរឹងទទឹង ឬក៏ធ្វើឲ្យបុគ្គលនោះអស់សង្ឃឹមពីការទទួលយកនូវការសារភាពកំហុស(តាវហ្ពាត់)។
4. អនុញ្ញាតឲ្យដាក់បណ្តាសាដោយមិនកំណត់ឈ្មោះចំៗចំពោះអ្នកដែលមានលក្ខណៈបែបនោះ។